Ayubu 14

14 ¹"Mwanadamu, aliyezaliwa na mwanamke, ana siku chache na amejaa taabu. ²Huchipuka kama ua kisha hunyauka; hukimbia kama kivuli wala hasidumu. ³Je, wewe humkazia macho mtu kama huyo? Nawe wanileta hukumuni mbele yako? ⁴Ni nani awezaye kutoa kitu safi kutoka katika kichafu? Hakuna hata mmoja. ⁵Kwa kuwa siku zake zimewekwa, hesabu ya miezi yake iko kwako, nawe umeweka mipaka asiyoweza kuivuka, ⁶geuza macho yako mbali naye, apate kupumzika, hata atakapomaliza siku yake kama mtu wa kuajiriwa.

⁷"Kwa maana lipo tumaini kwa mti: ukikatwa, utachipuka tena, na machipukizi yake hayatakoma. ⁸Ijapokuwa mzizi wake unazeeka ardhini na kisiki chake hufa mavumbini, ⁹kwa harufu ya maji utachipua na kutoa matawi kama mmea mpya. ¹⁰Lakini mwanadamu hufa na kulazwa chini; mtu hukata roho, naye yuko wapi? ¹¹Kama maji yatowekavyo katika ziwa, na mto uishavyo na kukauka, ¹²vivyo hivyo mwanadamu hujilaza wala hainuki; hata mbingu zitakapokoma, hataamka wala kuamshwa katika usingizi wake.

¹³"Laiti ungenificha kaburini, ukanisitiri hata hasira yako itakapopita, ukaniwekea wakati uliopangwa, kisha ukanikumbuka! ¹⁴Kama mwanadamu akifa, je, atakuwa hai tena? Siku zote za utumishi wangu wa taabu ningengoja, hata upya wangu utakapokuja. ¹⁵Wewe ungeita, nami ningekujibu; ungeitamani kazi ya mikono yako. ¹⁶Kwa maana hapo ungehesabu hatua zangu; usingeweka macho juu ya dhambi yangu. ¹⁷Uasi wangu ungetiwa muhuri katika mfuko, nawe ungeifunika dhambi yangu.

¹⁸"Lakini kama mlima uangukavyo na kubomoka, na mwamba uondolewavyo mahali pake, ¹⁹kama maji yachakazavyo mawe na mafuriko yake yasombavyo udongo wa nchi, vivyo hivyo wewe waliangamiza tumaini la mwanadamu. ²⁰Wewe humshinda nguvu milele, naye hupita zake; wewe waharibu uso wake na kumfukuza. ²¹Wanawe wapata heshima, wala yeye hajui; hushushwa chini, wala yeye hatambui. ²²Yeye huhisi tu maumivu ya mwili wake mwenyewe, naye huomboleza kwa ajili yake mwenyewe tu."