Mi eng' bukuit
Bukuit

Kowal Eliphas Kogeny

Kaabagaakta Eliphas kaanyeet. Igikyin kutitap Job ineegei, ak ma mi chii ne ki sich eng' kwony ne tiliil. Tiendi kiboorunetap chiito ne ya, kamuiset eng' itigap ineendet, mwanik che ma kolosyei, ak machei koger Job inyeegei eng' olooto.

Sura 15.

Ki wal Eliphas Temanindet, kole: “Tos kowal chii ne utaat eng' naet ne po koristo, ak konyiit moennyi koristo ne po kong'asiis? a a v2 Koristo ne po kong'asiis ko ki koristo ne lalang' ne po surkweet — kaboorunetap tangoita ak ng'emisyet ne sirsirto eng' Job komugul. Tos kobolji eng' ng'aleek che ma po kiy, eng' ng'aleek che ma yaei komyee? Ago igeestoe iywenatetap Kamuktaindet, ak itil kabwaatet eng' taitap Kamuktaindet. Amu ineeta tengekeng'ung' kuting'ung', ak ichoor ng'elyeptap pichu che ng'woneen. Igikyin kuting'ung' inyee, ma anee; mwaei kutusweekwok paornateet agobo inyee. Tos inyee chii ne tai ne ki kisich? Tos ki kisich inyee kot kotomo komi tuloonook? Tos ki ikas eng' kapkirwooget ne po Kamuktaindet? Tos inyee keny ne tinyei utaatyet? b b v8 "Kapkirwoogetap Kamuktaindet" ko tuiyetap kipsengwet ye tononi Kamuktaindet kobooto piikyik che po kipsengwet — iyoorei Eliphas Job agobo kole tinyei naet ne po kooi. Nee ne inai inyee ne ma kinai echeek? Nee ne iguiye ne ma mi echeek agine? Mi among echeek che tinyei kalwalek ak poisyek, murenik che eecheen kosiir kwandang'ung'. Tos mengech agoonin kagaigaenigap Kamuktaindet, ng'olyoot ne king'alaalun eng' kaalyeet? Amu nee si koip muguleldang'ung' inyee, ak amu nee si koleelit konyekyuk, si iweek kabuuseng'ung' agobo Kamuktaindet, ak igoonu ng'aleek che uu nuu konyo eng' kuting'ung'? Nee chii, si koek ne tiliil? Nee ne ki sich eng' kwony, si koek ne po iman? Keero, ma mang'u Kamuktaindet pichoonyi che tiliileen, ak ma tiliileen kipsengwet eng' tainnyi; Konai anyun ne yaach ak ne kong'emak, chii ne ee yaityet ko uu peek! Aboorun; igas anee; amwaun kiy ne kaageer, kiy ne ki mwa piik che utaat, ma koun kiy ne ki konyoor kobun kwanisyekwak, che ki kigoochin icheek keny emet, kot kotomo konyo toek age tugul among icheek. Nyalili chiitap yaityet peetuusyekyik tugul, kenyiisyek tugul che kigoochi ne ma tinyei rireenetapkei. Nyiei itiikyik kasiisyek che iywenotin; eng' porotennyi konyoonji ng'emindet. Ma yan kole chililtos eng' tuutyet; kiga kimaar kole po rotweet. Walwalei kocheeng'e amitwogik, kole, ‘Mi ano?’ Nai kole neegit peetuutap tuutyet. Iywei pichiindo ak nyalilda ineendet; kogimegitu ko uu laitoryat ne choorgei lugeet, amu ki toong'u eunnyi agobo Kamuktaindet, ak koireeny ne Kimnotin, charunee ineendet eng' etuuset, kobooto koriindo ne tuui ne kiim; amu ki tuch tainnyi mwanik, ak koruruuch panyeek koisto choget, ki menye nganasook che kong'emak, eng' koriik che mo meny chii age tugul, che choorgei koek keburusyek che tooreer. Ma koegu chii ne tinyei kimnateet; ma kimiiti tuguukyik, ak ma waktoe tuguukyik eng' ng'wony. Ma chililtos eng' tuutyet; iresyo liplibenetap maat temekyik, ak koristotap kutitap Kamuktaindet koibu ineendet. Amat komang'u tangoita, koiberbergei, amu egu tangoita kiy ne konyooru. Keyaakte legennyi komugul kotomo konyo sait nenyi, ak ma nyalileen temennyi. Koilelekte logoekyik che ma ruryotiin ko uu keetitap sabibuk, ak iroroi taaptokyik ko uu mseituni. Amu tuiyetap che ma po iman ko tangoita, ak peelei maat meng'otosyek che po sastaet. Komoe nyalilda ak kosich yaityet; koyaei moennywa ng'aalseet.”