Ti Maikadua a Panangsungbat ni Eliphaz

Impaay ni Elifaz ti panagbalbaliw. Ti ngiwat ni Job a mismo ti mangkondenar kenkuana, ket awan ti naipasngay iti babai a nadalus. Ibagana ti ordinario a ladawan ti nadangkes a tao, ti buteng iti lapayagna, kinabaknang a saan a mataginayon, ket kayatna a makita ni Job ti bagina iti daytoy.

Kapitulo 15.

Insungbat ni Eliphaz a Temanita: “Rumbeng kadi a sumungbat ti masirib a tao iti pannakaammo a kas iti angin, ket punnuenna ti tianna iti angin manipud daya? ^a Rumbeng kadi a makiuman isuna iti awan serserbina a sasao, kadagiti sao a awan pagimbagan? Ngem ikkatem ti panagbuteng iti Dios ken sarsardengem ti panagpampanunot iti sangoanan ti Dios. Ta ti basolmo ti mangisuro iti ngiwatmo, ket piliem ti dila dagiti nasikap. Ti bukodmo a ngiwat ti mangkondenar kenka, saan nga siak; ti bukodmo a bibig ti agsaksi a maibusor kenka. Sika kadi ti immuna a tao a nayanak? Nayanakka kadi sakbay dagiti turod? Dimngegka kadi iti gimong ti Dios? Idulinmo kadi ti kinasirib para kenka laeng? ^b Ania ti ammom a di mi ammo? Ania ti maawatam a saan met a masarakan kadakami? Adda kadakami dagiti puraw ti buok ken dagiti nataengan, dagiti lallaki a nataengan pay ngem ti amam. Basit unay kadi kenka dagiti liwliwa ti Dios, ti sao a naalumamay a naibaga kenka? Apay nga ilulayawnaka ti pusom, ken apay nga agsilsilnag dagiti matam, nga ibaw-ingmo ti espirituom a maibusor iti Dios ket palubosam a rummuar iti ngiwatmo dagiti kasta a sasao? Ania ti tao, tapno agbalin a nadalus? Ania ti naiyanak iti babai, tapno agbalin a nalinteg? Kitaem, awan ti pagtalkan ti Dios kadagiti nasantoanna, ket saan a nadalus dagiti langit iti imatangna; ad-adda pay ngarud ti maysa a nakarimon ken nadunor, ti tao nga uminom iti kinakillo a kas iti danum! Ipakitak kenka; dengngegnak; ibagak kenka ti nakitak, ti inwaragawag dagiti masirib a lallaki, nga awan impalimedda iti inawatda kadagiti amada, a kadakuada laeng naited ti daga, idi awan pay ti ganggannaet a simrek iti tengngada. Agsagaysay iti ut-ot ti nadangkes a tao iti amin nga al-aldawna, iti amin a tawen a naidulin para kadagiti naranggas. Napnoan dagiti lapayagna iti nakabutbuteng a timek; iti kinarang-ayna, dumteng kenkuana ti manangdadael. Saanna a patien a makalasatto iti sipnget; naitudingan isuna para iti kampilan. Agpagpagna a mangsapsapul iti tinapay, nga agsaludsod, ‘Sadino ti adda?’ Ammona nga asidegen ti aldaw ti sipnget. Pagbutngen ti rigat ken panagladingit isuna; parmekenda isuna a kas iti ari a nakasagana iti gubat, gapu ta inyunnatna ti imana a maibusor iti Dios ken sinuppiatna ti Mannakabalin-amin, a nagtaray a nangsupiat kenkuana a naulpit, iti napuskol ken napabileg a kalasag; gapu ta inabbongna ti rupana iti taba ken pinataudna ti lasag iti aglawlaw ti balakangna, nagtaeng isuna kadagiti naguba a siudad, kadagiti balay a awan koma ti agtaeng, nga agsagana nga agbalin a bunton ti rebba. Saanto a bumaknang; saanto a agtalinaed ti kinabaknangna, wenno agwaras iti daga dagiti sanikuana. Saanto a makalasat iti sipnget; ti gil-ayab ti mangpaglaylay kadagiti urbonna, ket ti anges ti ngiwat ti Dios ti mangpukaw kenkuana. Dina koma patien ti awan serserbina, nga allilawenna ti bagina, ta ti awan serserbina ti gunggonana. Mabayadanto a naan-anay ti gunggonana sakbay ti tiempona, ket saanto a nalangto ti sangana. Iwarasnanto dagiti di pay nalutu nga ubasna a kas iti ubas ken ibellengnanto dagiti sabongna a kas iti kayo nga olibo. Ta baog ti gimong dagiti di managdios, ket puoran ti apuy dagiti balay ti panagsuhol. Agsikogda iti riribuk ken mangipasngayda iti dakes; ti aanakanda ti mangisagana iti allilaw.”