Mi eng' bukuit
Bukuit

Piik che Igaigaei che Ya

Kuure Job icheek kaigaisyonik che ya, ak kole muuchi agine ang'alaal ko uu icheek, ngot ki kiwalaksei olinwekwak. Boorunei Kamuktaindet ko uu chiitap lugeet ne kanam ineendet kaatinnyi ak kotebtoe ineendet koek ne imwogei. Ago testai kole mi kageng'waindennyi ne tononi eng' kipsengwet.

Sura 16.

Kiwol anyun Job, kole: “Kagas tuguuk che chaang' che uu chu; okweek tugul ko piik che igaigai che ya. Tos ma mi kagesunet ne po ng'aleekwok che uu koristo? Nee ne gereerin si iwolei kotugul? Amuuchi anee agine ang'alaal ko uu okweek, ngot omi oldanyu; amuuchi atui ng'aleek agobo okweek, ak arure metinnyu agobo okweek. Ago amuuchi agimitok eng' kutinnyu, ak kagaigaetap kutinnyu koisto nyalildang'ung'. Ngot ang'alaal, ma koisto nyalildanyu; ak ngot agerei kutinnyu, nee ne meto? Imanit, kagong'etyo anee nguno Kamuktaindet; kagiarageso piiguk tugul. Kagiyamyawo, ak kagoek paornateet; yamyeetennyu ng'eetei konaatiwo, ak kobaoryanji anee eng' tainnyu. Kagotonatawo angeennyi ak kousauswo; kagower kelekyik agobo anee; puunyootnyu keerot konyekyik. Kagoyaat piik kutusweekwak agobo anee; kagorabach matandanyu eng' sasisyet; kaiyumgei agobo Kageng'wektoo Kamuktaindet eunegap piik che ma po imanda, ak kowiirtowo eunegap kiptengeginik. Ki amenye eng' kamuung'et, ak kagotuiwo; kagonam kaatinnyu ak koitilwo komengegitu; kagotebtowo koek ne imwogei. Kayiem mwoogikyik anee; kotilei soromokyuk ama tinye rireenet, ak koroong'ji ng'wanindonyu eng' ng'wony. Kagobirwo pareet eng' pareet; kobwaanjino ko uu nyigan ne po lugeet. Kagotuch kuniet eng' poortanyu, ak kaatup togeennyu eng' ng'ung'unyek. Kagoberberitu tainnyu eng' riirek, ak koni urweet ne nereen eng' korogap konyekyuk, nganda ma mi koroomnateet eng' eunnyu, ak ko tiliil saaennyu. Ng'wony, matun iger korotiikyuk, ak amat konyoor kewaachennyu ole imuung'ei. Agot nguno, mi paoryandennyu eng' kipsengwet, ak mi ne ng'alaaljin eng' parak. Sasisyowo choronokyuk; isururunee konyekyuk peegap riirek koba Kamuktaindet, si kobesyei ng'aleegap chiito eng' taitap Kamuktaindet, ko uu ye besyei weeriitap chii ng'aleegap chiitap kokwennyi. Amu kosiir kenyiisyek che ng'ering' kityo, ak yeityo awendi ooreet ne ma po kiweekyigei kogeny.”