Job 16

16 ¹Den Job answer sey: ²"I don hear plenty things like dis; all of una na comforters wey no dey comfort person at all. ³Dis your talk-talk wey be like wind, e no get end? Wetin dey vex you wey make you dey answer answer so? ⁴Me too fit talk like una dey talk, if to sey na una dey for my place; I fit line up plenty words against una, come dey shake my head give una. ⁵But I for use my mouth make una strong, and di comfort wey comot for my lips for cool down una pain. ⁶If I talk, my pain no dey cool down; and if I hold my mouth, wetin dey comot from me? ⁷For true, now God don tire me finish; you don scatter all my people. ⁸You don dry me up, and e don turn to witness against me; as I don lean so, e stand up against me come testify for my face. ⁹Im vex don tear me and attack me; e don gnash im teeth for me; my enemy dey fix im eye for me. ¹⁰People don open dia mouth wide dey look me; dem don slap my jaw to shame me; dem gada together against me. ¹¹God don hand me over give bad people, come throw me inside di grip of wicked people. ¹²I dey rest well, and e break me to pieces; e catch me for neck come mash me down; e don set me up like im target. ¹³Im archers surround me; e cut my kidney open, e no show mercy, and e pour my gall for ground. ¹⁴E dey break me, blow after blow; e rush come meet me like soldier wey dey fight war. ¹⁵I don sew mourning cloth cover my skin, come bury my forehead for inside sand. ¹⁶My face don red from cry-cry, and deep darkness dey for my eyelid, ¹⁷even as no violence dey for my hand and my prayer clean. ¹⁸Earth, no cover my blood, and make my cry no find any place to rest. ¹⁹Even now, my witness dey for heaven, and di one wey dey speak for me dey up high. ²⁰My friends dey scorn me; my eye dey pour tears go give God, ²¹make e fit plead di case of man before God, like as pikin of man dey plead for im neighbour. ²²Because na small years remain, and den I go waka di road wey person no dey return from."