Khonsak Kubü Solotibü Shuong

Jobei haoen to maang suenbü solotibü shuong dogo lauda, hoba kishang jeiyolonga haoei kho tegü ngüh ong lautila thük dogo lauda. Haoei Mühghaü to sepaibou tegü sembakei, aoei hao khü ka khünan hao to khi tegü phokukei. Lausikei haoei kü matjemshang khuthüka ki dogo ladangkei lauda.

Chapter 16.

Kheijinei Jobei jongaiko laukei, “Hai tegübü thinei juong ngei ditkei; kan pendou khonsak kubü solotibü shuong kia. Kaneibü nopbü ngüh thon akilo? Ai khoei kan to khauangtiko kan khünei jongaida? Kan lauda tegü ngokei laula thükkei, khei kan ngeibü kaoena kialonga; ngei kan khulimbo ngüh shenyoan thükkei hoba kan to ngeibü khu kangtila thükkei. Lausikei ngeibü sembungei kan hau kitilabü, hoba ngeibü sembungkhop solotibüei kaneibü maang sulabü. Ngo laulaje, ngeibü maang asulabü; hoba ngo nangalaje, ai ngo ka satlabü? Maimaitham tou Mühghaüei ngo semthetan kutikei; no ngeibü tan pendou mautikei. No ngo hübü kutikei, hoba kho aukabü che yeikei; ngeibü hübübüei ngo khulimbo pienkei hoba ngeibü thenyek to aukabü kua. Haoeibü khauangei ngo taketkei hoba ngo shikei; haoei jembü hauh ngo khulimbo anyaikei; ngeibü dangbouei ngo thüka jembü nyek souhatda. Mütshuongei ngo to jembü sembung hai lautikei; haoenei nyikubü ngeibü om to ipbei; haoen ngo khulimbo liko kamshaikei. Mühghaüei ngo asaopobü shuong ik to khümbo kua hoba amaibü shuong ik to ngo attikei. Ngo haksoa kikei, hoba haoei ngo phetnyinkei; haoei ngeibü ngüma lapjung louan ngo tetngokkukei; haoei ngo jembü khi tegü phokukei. Haoeibü lau jungbü shuongei ngo kailepbei; haoei onou akiko ngeibü kelang netla yeitikei hoba ngeibü senmaang kaoa jinkukei. Haoei ngo ladüngnei ipbo phetnyinkei; haoei lakjaibou tegü ngo khulimbo panteiko loukei. Ngei ngeibü khondaka senounei soyoan apbei hoba ngeibü khüngja thamngu ka apbukei. Haapbü shanga ngeibü thenyek amaiko yeitia, hoba ngeibü nyek thüka nakthüh kaangbü kikei, Ngeibü ika ik shatyobü akisikei hoba ngeibü welaubü hinseibü ki. Kao, ngeibü sii anaangjan, hoba ngeibü ngekbü haksoshang ahaptishima. Chühashi, tou ngeibü aukabü khuthüka ki, hoba kü la yingkubou thükae ki. Ngeibü jenabou shuongei ngo nyikuda; ngeibü nyekei Mühghaü to nyeksi kouda, Haoei Mühghaü thedanga müt che shanga yingkutilabü, müteibü shouei jembü lepbou shanga yingkubü tegü. Aishanga po shisho ong danlabü, hoba kheijinei ngo longeiche akibü lam to haulabü.”