Ngeibü Soushou Shaleda
Jobeibü soushou shaleakei, hoba hee kho chaang tegü semenbü yeida. Aoei kü shanga thekubü kulabü dogo haoei pheda, aishanga jaisi cheei songsido oyola athük. Haoei nakthüh to kü bou hoba yang to kü nyu dogo lautilonga, kheijinei haoeibü maanglem lanei ki?
17 1“Ngeibü soushou shaleakei, kü chalou shuong apyokei, hee kü shanga lamlean kia. 2Maimaitham mü awealaubü shuongei ngo püetda, hoba ngeibü nyekei haoeneibü khauangtibü ka souhatko kia.
3“No jembüei kü shanga authebü linjinkushi; lubü aoei cheei kü shanga thekubü kulabü? 4Aishanga nyi haoeneibü maangpon ditenbü ka khinkukei; khoei nyi haoen to hau kila atheletlabü. 5Aoei ailamaiphop shanga jembü lepbü shuong khulimbo aukabü kulaje, haoeibü chilangeibü nyek athüklabü.
6“Haoei ngo phang shuong amon ngüh che kümbei, haoenei kü thenyek to eok thokbü müt che. 7Ngeibü nyek maangmaubü ka yukmetan athükkei, hoba kü limbo pendou yemkao tegü yeikei. 8Maang tangbü shuongei ho shanga maangpanglabü, hoba shed akibü mütei shedbü kümbü müt khulimbo meimeilabü. 9Lausikei saopobü mütei jembü lam natenlabü, hoba ik saüenbü müt aei hau kiko loenlabü.
10“Lausikei kan pendou nyibou sepeinyu ngaiashi, tou kaiya—kan amon songsido kibü müt che ngei ahaptilabü. 11Kü chalou shuong dankhümda, kü lamshuong leiluan apbei, hoba kü maangponeibü mangsühbü kho yoa leiluan apbei. 12Haoenei nangnak chalou la yeitikuda; ‘ngesakbü nyangko kia,’ dogo nakthüh thedanga haoenei lauda. 13Ngei hee kü chem tegü maanglemlonga, nakthüh ka kü shen phokulonga, 14püngkhün to, ‘No kü bou ki,’ dogo ngealonga, hoba yangei to, ‘Kü nyu’ hoba ‘Kü na,’ dogo lauko, 15kheijinei kü maanglem laeto ki? Aoei kü shanga maanglem che hapla thükla? 16Kho hee bakou to yanlabü lo? Senei chela thamngu khüto yan lotlabü lo?”
