ഇയ്യോബ് 17 FHB Father's Heart Bible™

17 ¹“എന്റെ ആത്മാവ് തകർന്നിരിക്കുന്നു, എന്റെ നാളുകൾ കെട്ടുപോയിരിക്കുന്നു, ശവക്കുഴി എനിക്കായി ഒരുങ്ങിയിരിക്കുന്നു. ²തീർച്ചയായും പരിഹാസക്കാർ എന്നെ വളഞ്ഞിരിക്കുന്നു, അവരുടെ പരിഹാസത്തിൽനിന്ന് മാറിനോക്കുവാൻ എന്റെ കണ്ണുകൾക്കു കഴിയുന്നില്ല.

³“അങ്ങയുടെ അടുക്കൽ എനിക്കായി ഒരു ജാമ്യം വെക്കേണമേ; എന്റെ ജാമ്യക്കാരനായി മറ്റാരാണ് വാക്കു നല്കുക? ⁴ഗ്രഹിക്കാതവണ്ണം അവരുടെ മനസ്സ് അങ്ങ് അടച്ചുകളഞ്ഞിരിക്കുന്നു; അതുകൊണ്ട് വിജയിക്കുവാൻ അവരെ അങ്ങ് അനുവദിക്കുകയില്ല. ⁵സ്വന്തലാഭത്തിനായി സ്നേഹിതരെ ഒറ്റിക്കൊടുക്കുന്നവൻ—അവന്റെ മക്കളുടെ കണ്ണുകൾ ക്ഷയിച്ചുപോകും.

⁶“ജനതകളുടെ ഇടയിൽ അവിടുന്ന് എന്നെ ഒരു പഴഞ്ചൊല്ലാക്കിയിരിക്കുന്നു, മുഖത്തു തുപ്പപ്പെടുന്ന ഒരുവനായി. ⁷ദുഃഖത്താൽ എന്റെ കണ്ണ് മങ്ങിപ്പോയിരിക്കുന്നു, എന്റെ അവയവങ്ങളെല്ലാം ഒരു നിഴൽപോലെയായിരിക്കുന്നു. ⁸നേരുള്ളവർ ഇതു കണ്ട് സ്തബ്ധരായിപ്പോകുന്നു, നിർദോഷി ഭക്തിഹീനനെതിരെ ഉണർന്നെഴുന്നേല്ക്കുന്നു. ⁹എങ്കിലും നീതിമാൻ തന്റെ വഴിയിൽ ഉറച്ചുനില്ക്കുന്നു, ശുദ്ധമായ കൈകളുള്ളവൻ കൂടുതൽ കൂടുതൽ ബലവാനായിത്തീരുന്നു.

¹⁰“എന്നാൽ നിങ്ങളെല്ലാവരും തിരികെ വരുവിൻ, ഇപ്പോൾ വരുവിൻ—നിങ്ങളുടെ ഇടയിൽ ജ്ഞാനിയായ ഒരുവനെപ്പോലും ഞാൻ കാണുന്നില്ല. ¹¹എന്റെ നാളുകൾ കഴിഞ്ഞുപോയി, എന്റെ പദ്ധതികൾ അറ്റുപോയി, അവയോടൊപ്പം എന്റെ ഹൃദയത്തിന്റെ ആഗ്രഹങ്ങളും. ¹²അവർ രാത്രിയെ പകലാക്കി മാറ്റുന്നു; ‘വെളിച്ചം,’ അവർ പറയുന്നു, ‘അടുത്തുണ്ട്’—ഇരുട്ടിന്റെ മുമ്പിൽ. ¹³ശവക്കുഴിയെ എന്റെ ഭവനമായി ഞാൻ പ്രതീക്ഷിക്കുന്നെങ്കിൽ, ഇരുട്ടിൽ എന്റെ കിടക്ക ഞാൻ വിരിക്കുന്നെങ്കിൽ, ¹⁴കുഴിയോട്, ‘നീ എന്റെ പിതാവ്,’ എന്നും പുഴുവിനോട്, ‘എന്റെ അമ്മ,’ ‘എന്റെ സഹോദരി,’ എന്നും ഞാൻ വിളിക്കുന്നെങ്കിൽ, ¹⁵പിന്നെ എന്റെ പ്രത്യാശ എവിടെ? എനിക്കായി എന്തെങ്കിലും പ്രത്യാശ ആർക്കു കാണാൻ കഴിയും? ¹⁶അത് ശവക്കുഴിയുടെ വാതിലുകളിലേക്ക് ഇറങ്ങിപ്പോകുമോ? നാം ഒരുമിച്ച് പൊടിയിലേക്ക് ഇറങ്ങുമോ?”