Me Honhom Abubu
Hiob honhom abubu, na ɔte nka sɛ wɔasiesie ada no sɛ mpa. Ɔbisa sɛ hena na ɔbɛyɛ n'awowasini, ɛfiri sɛ ne nnamfo no mu baako mpo nni nyansa biara. Sɛ ɛsɛ sɛ ɔfrɛ amena no n'agya na osunsono no ne maame a, ɛnde ɛhe na n'anidasoɔ wɔ?
17 1“Me honhom abubu, me nna adum, ɔda no ayɛ krado ama me. 2Ampa ara fɛwdifo atwa me ho ahyia, na mʼani ntumi mfi wɔn ahohora so.
3“Fa awowa bi to hɔ ma me wɔ wo nkyɛn; hena bio na ɔbɛhyɛ bɔ agyina mʼanan mu? 4Efisɛ woato wɔn adwene mu sɛnea wɔrente ase; enti worenma wɔn nni nkonim. 5Obi a ɔbɔ ne nnamfo sobo de hwehwɛ mfaso ma ne ho—ne mma aniwa bɛfura.
6“Wayɛ me abebu asɛm wɔ aman no mu, obi a wɔtetew ntasu gu nʼanim. 7Mʼani ayɛ kusuu awerɛhow nti, na me nipadua akwaa nyinaa ayɛ sɛ sunsuma. 8Eyi ho dwiri wɔn a wɔteɛ, na nea ne ho nni asɛm no sɔre tia wɔn a wonni nyamesu. 9Nanso ɔtreneeni kura ne kwan mu den, na nea ne nsa ho tew no nya ahoɔden kɛse kɛse.
10“Nanso munsan mmra, mo nyinaa, mommra seesei—minhu onyansafo baako mpo wɔ mo mu. 11Me nna atwam, me nhyehyɛe abubu, na me koma akɔnnɔ nso ne wɔn abubu. 12Wɔdan anadwo yɛ no awia; ‘Hann,’ wɔka se, ‘abɛn’—wɔ sum anim. 13Sɛ mehwɛ kwan sɛ ɔda bɛyɛ me fi, sɛ mesɛw me mpa wɔ sum mu, 14sɛ mefrɛ amena no se, ‘Wo ne mʼagya,’ na meka kyerɛ sonsono no se, ‘Me na’ ne ‘Me nuabaa’ a, 15ɛnde, mʼanidaso wɔ he? Hena na obetumi ahu anidaso bi ama me? 16Ɛbɛsian akɔ ɔda no apon ano anaa? Yɛbɛbom asian akɔ mfutuma mu anaa?”
