Roho Wakwa Nĩ Mũunange
Roho wa Ayubu nĩũunĩkĩte na mbĩrĩra ĩramũigua ta ũrĩrĩ ũrĩa wara. Ekũũria nũũ ũngĩmwĩrũgamĩrĩra, kuona atĩ gũtirĩ mũrata o na ũmwe ũrĩ na ũũgĩ wa kũheana. Angĩkorwo no nginya eete irima ithe na igunyũ nyina, kĩĩrĩgĩrĩro gĩake kĩrĩ ha?
17 1“Roho wakwa nĩ mũunange, matukũ makwa nĩmahorie, naguo mbĩrĩra nĩĩĩhaarĩirie nĩ ũndũ wakwa. 2Ti-itherũ nĩnjirigĩirwo nĩ anyũrũrania, namo maitho makwa matingĩhota gũtiga kũrora ũnyũrũrania wao.
3“Ĩkĩra kĩĩrĩĩga nĩ ũndũ wakwa harĩ wee mwene; nũũ ũngĩ ũngĩĩheana atuĩke mũrũgamĩrĩri wakwa? 4Amu nĩũhingĩte meciiria mao matige gũtaũkĩrwo; nĩ ũndũ ũcio ndũkametĩkĩria mahootane. 5Mũndũ ũrĩa ũkunyanĩra arata ake nĩguo eyonere uumithio—maitho ma ciana ciake nĩmakaaga hinya.
6“Nĩanduĩte thimo gatagatĩinĩ ka ndũũrĩrĩ, mũndũ ũrĩa andũ matuĩraga mata ũthiũinĩ. 7Riitho rĩakwa nĩrĩdumĩte nĩ ũndũ wa kĩeha, nacio ciĩga ciakwa ciothe nĩ ta kĩĩruru. 8Andũ arĩa arũngĩrĩru nĩmakĩgegaga nĩ ũndũ ũcio, nake ũrĩa ũtarĩ na ihĩtia nĩookĩragĩra ũrĩa ũtetĩkĩtie Ngai. 9No ũrĩa mũthingu nĩarũmĩtie njĩra yake, nake ũrĩa ũrĩ na moko matheru nĩakĩragĩrĩria kũgĩa na hinya mũno na makĩria.
10“No cookai, inyuothe, ũkai rĩu—ndirona mũndũ o na ũmwe mũũgĩ gatagatĩinĩ kanyu. 11Matukũ makwa nĩmathirĩte, mĩbango yakwa nĩmĩtuanange, hamwe nayo merirĩria ma ngoro yakwa. 12Nao magarũranagia ũtukũ matue mũthenya; ‘ũtheri,’ makoiga atĩrĩ, ‘ũrĩ hakuhĩ’—o nduma ĩrĩ mbere yao. 13Angĩkorwo nĩndĩrĩrĩgĩrĩire mbĩrĩra ĩtuĩke nyũmba yakwa, angĩkorwo nĩndaarĩire ũrĩrĩ wakwa ndumainĩ, 14angĩkorwo nĩnjĩĩtire irima atĩrĩ, ‘Wee nĩwe baaba,’ na ngeera igunyũ atĩrĩ, ‘Maitũ’ na ‘Mwarĩ wa maitũ,’ 15mwĩhoko wakwa ũkĩrĩ kũ? Nũũ ũngĩona mwĩhoko o na ũrĩkũ nĩ ũndũ wakwa? 16Hihi ũgaikũrũka nginya ihingoinĩ cia mbĩrĩra? Hihi tũgaikũrũkania hamwe rũkũngũinĩ?”