Jobu 17

17 ¹“Ẹ̀mí mi ti fọ́, ọjọ́ mi ti paná, isà òkú ti ṣetán fún mi. ²Dájúdájú, àwọn ẹlẹ́gàn yí mi ká, ojú mi kò sì lè yẹsẹ̀ kúrò nínú ìfibú wọn.

³“Fi ìdúró lélẹ̀ fún mi lọ́dọ̀ ara rẹ; ta ni ẹlòmíràn tí yóò di onídúró mi? ⁴Nítorí ìwọ ti sé ọkàn wọn mọ́ kúrò nínú òye; nítorí náà ìwọ kì yóò jẹ́ kí wọ́n borí. ⁵Ẹni tí ó fi àwọn ọ̀rẹ́ rẹ̀ sùn nítorí èrè ara rẹ̀—ojú àwọn ọmọ rẹ̀ yóò rẹ̀wẹ̀sì.

⁶“Ó ti sọ mí di òwe láàrin àwọn ènìyàn, ẹni tí wọ́n ń tutọ́ sí ojú. ⁷Ojú mi ti ṣú nítorí ìbànújẹ́, gbogbo ara mi sì dàbí òjìji. ⁸Ẹnu yóò ya àwọn olódodo sí èyí, àwọn aláìlẹ́ṣẹ̀ yóò sì dìde sí àwọn aláìwà-bí-Ọlọ́run. ⁹Síbẹ̀ olódodo yóò rọ̀ mọ́ ọ̀nà rẹ̀, ẹni tí ó ní ọwọ́ mímọ́ yóò sì máa ní agbára sí i síwájú sí i.

¹⁰“Ṣùgbọ́n ẹ padà wá, gbogbo yín, ẹ wá nísinsìnyí—èmi kò rí ọlọ́gbọ́n kan nínú yín. ¹¹Ọjọ́ mi ti kọjá, ètò mi ti já, àti pẹ̀lú wọn, àwọn ìfẹ́ ọkàn mi. ¹²Wọ́n sọ òru di ọ̀sán; ‘ìmọ́lẹ̀,’ wọ́n wí pé, ‘ó súnmọ́’—ní ojú òkùnkùn. ¹³Bí mo bá ní ìrètí isà òkú gẹ́gẹ́ bí ilé mi, bí mo bá tẹ́ ibùsùn mi nínú òkùnkùn, ¹⁴bí mo bá pe kòtò pé, ‘Ìwọ ni baba mi,’ tí mo sì pe kòkòrò pé, ‘Ìyá mi’ àti ‘Arábìnrin mi,’ ¹⁵nígbà náà, níbo ni ìrètí mi wà? Ta ni ó lè rí ìrètí kankan fún mi? ¹⁶Ǹjẹ́ yóò sọ̀kalẹ̀ lọ sí ẹnu-ọ̀nà isà òkú? Ǹjẹ́ àwa yóò jọ sọ̀kalẹ̀ lọ sínú erùpẹ̀?”