Ayubu 17

17 ¹"Roho yangu imevunjika, siku zangu zimezimwa, kaburi liko tayari kwa ajili yangu. ²Hakika wenye dhihaka wamenizunguka, na macho yangu hayawezi kuachana na maudhi yao.

³"Weka rehani kwa ajili yangu kwako mwenyewe; ni nani mwingine atakayetoa neno lake kuwa mdhamini wangu? ⁴Kwa maana umezifunga akili zao zisipate ufahamu; kwa hiyo hutawaacha wapate ushindi. ⁵Yeye awashutumuye rafiki zake kwa faida yake mwenyewe—macho ya watoto wake yatazimia.

⁶"Amenifanya kuwa kitu cha kunenwa katika mataifa, mtu ambaye watu humtemea mate usoni. ⁷Jicho langu limefifia kwa huzuni, na viungo vyangu vyote ni kama kivuli. ⁸Wanyofu wanashangaa kwa jambo hili, na asiye na hatia hukasirika juu ya asiyemcha Mungu. ⁹Lakini mwenye haki hushikilia njia yake, na yeye aliye na mikono safi huzidi kuwa na nguvu zaidi na zaidi.

¹⁰"Lakini rudini, nyote, njoni sasa—sipati hata mtu mmoja mwenye hekima miongoni mwenu. ¹¹Siku zangu zimepita, mipango yangu imekatika, na pamoja nayo tamaa za moyo wangu. ¹²Wao hugeuza usiku kuwa mchana; 'nuru,' wasema, 'iko karibu'—mbele ya giza. ¹³Kama nikitumaini kaburi kuwa nyumba yangu, kama nikitandika kitanda changu gizani, ¹⁴kama nikiliambia shimo, 'Wewe ndiwe baba yangu,' na funza, 'Mama yangu' na 'Dada yangu,' ¹⁵basi liko wapi tumaini langu? Ni nani awezaye kuona tumaini lolote kwangu? ¹⁶Je, litashuka hadi malango ya kaburi? Je, tutashuka pamoja mavumbini?"