Nabari ang Akon Espiritu

Nabali ang espiritu ni Job kag ang lubnganan daw handa na nga pareho sang higdaan. Ginapamangkot niya kon sin-o ang magatindog nga manugsiguro sa iya, kay wala sing isa sa iya mga abyan nga may kaalam nga mahatag. Kon kinahanglan niya tawgon ang hunas nga iya amay kag ang ulod nga iya nanay, diin ang iya paglaum?

Kapitulo 17.

“Nabari ang akon espiritu, napalong ang akon mga adlaw, handa na para sa akon ang lulubngan. Sa pagkamatuud ginalibutan ako sang mga manugyaguta, kag ang akon mga mata indi makabulag sa ila pagpakahuya.

“Maghatag ka sing garantiya para sa akon sa imo kaugalingon; sin-o pa ang magahatag sang iya pulong subong akon manug-ako? Kay gintakpan mo ang ila mga hunahuna sa paghangup; busa indi mo sila pagtugutan nga magdaug. Ang nagasumbong sa iya mga abyan tungud sa iya kaugalingon nga kapuslanan—ang mga mata sang iya mga anak magapalong.

“Ginhimo niya ako nga hulubaton sa tunga sang mga katawohan, isa nga ginaduplaan nila sa guya. Nagdulom ang akon mata tungud sa kasubo, kag ang akon tanan nga mga bahin daw landong. Ang mga matarung natingala sini, kag ang mga walay sala naukyab batok sa mga didiosnon. Apang ang matarung nagapadayon sa iya dalan, kag ang isa nga may matinlo nga mga kamot nagalig-on sing labi kag labi pa.

“Apang magbalik kamo, kamo tanan, magkari kamo karon—wala ako sing makita nga isa ka maalam sa tunga ninyo. Nagligad na ang akon mga adlaw, nabali ang akon mga plano, kag upod sa ila ang mga handum sang akon tagiposoon. Ginabaylo nila ang kagab-ihon nga adlaw; ‘ang kapawa,’ siling nila, ‘malapit na’—sa atubang sang kadulom. Kon ginalauman ko ang lulubngan subong akon balay, kon ginahumlad ko ang akon higdaan sa kadulom, kon nagatawag ako sa buho, ‘Ikaw ang akon amay,’ kag sa ulod, ‘Akon iloy’ kag ‘Akon utod,’ diin na gali ang akon paglaum? Sin-o ang makakita sing bisan ano nga paglaum para sa akon? Magadulhog bala ini sa mga gawang sang lulubngan? Magapanaug bala kita nga magkaupod sa yab-ok?”