Nzimu Wanga Waswanyika
Nzimu wa Yobe waphwanyika na nthumbi isaoneka ninga bedi yakukonzedwa. Iye asabvundza kuti mbani anadzamuimira, thangwi nkhabe na xamwali m'bodzi ene ali na ndzeru yakupereka. Ngakhala iye asafunika kucemera dzenje kuti baba wanga na mbozi kuti mai wanga, cinyindiro cace ciri kupi?
17 1“Nzimu wanga waswanyika, ntsiku zanga zazimwa, nthumbi yandikhunganyikira. 2Mwandimomwene, anyakuseka andizungulira, maso anga nkhabe kukwanisa kuleka kuyang'ana kutikana kwawo.
3“Perekani cikole canga kuna imwe ene; mbani unango anapereka fala yace toera kukhala nyakunditsidzikiza? 4Thangwi imwe mwatseka manyerezero awo toera akhonde kubvesesa; natenepa imwe nee munaatawirisa toera akunde. 5Ule anasandukira axamwali ace toera kugumana pindu—maso a anace anadzaperewa mphambvu.
6“Iye andicita kukhala citsandzo cakusekwa pakati pa mitundu ya anthu, munthu wakuti anthu asandipswira mata kumaso. 7Diso yanga yacita bii thangwi ya kutsukwala, na manungo anga onsene ali ninga nthunzi. 8Anthu akulungama asadzumatirwa na pyenepi, wakusowa mulando asalimbana na anyakukhonda kulemedza Mulungu. 9Mbwenye wakulungama asaphatirira njira yace, ule ana manja akucena asathimiza mphambvu zace kakamwe.
10“Mbwenye bwererani imwe monsene, bwerani cincino—nee ndisagumana munthu m'bodzi wa ndzeru pakati panu. 11Ntsiku zanga zapita, manyerezero anga agwandika, pabodzi na iwo pifuno pya ntima wanga. 12Iwo asacinja masiku kukhala masikati; ‘ceza,’ iwo asalonga, ‘ciri cifupi’—pamaso pa cidima. 13Ndingadikhira nthumbi ninga nyumba yanga, ndingayala kama yanga n'cidima, 14ndingacemera dindi: ‘Iwe ndiwe baba wanga,’ na kuna honye: ‘Mai wanga’ na ‘Mulongo wanga,’ 15penepo cidikhiro canga ciri kupi? Mbani anakwanisa kuona cidikhiro canga? 16Kodi cinadzatsika mpaka ku misuwo ya nthumbi? Kodi tinadzatsika pabodzi mu pfumbi?”
