Imanglā Sākhayanghaira
Jobwui manglā yurhaira, kala kathewui ram chi apet thāda ngarānhaira da ana phaninga. Ngasotnao akhalala thangkhamei maleiwui vang, iwui vang nganingkhame khipā leikhala da ana ngahānga. Chomli ishāvā da, kala kachaili ishāva̱ da jiakha, iwui kachihān kali lei?
17 1"Imanglā sākhayanghaira, iwui mirin sāshimithaira, chikhur iwui vang ngarānhaira. 2Mashātkazarbingna kachangkhata ili rākuinama, kala imikna athumwui chānjam eina pākhaishaprarmana.
3"Nakhalatta eina iwui vang khangashit sāmilu; khipā khangatei akhana iwui vang nganingkhame ngasāra? 4Kaja nana athumwui ning theishingkakhuili shunghaira; chiwui vang eina nana athumli mathān ngasakmara. 5Tongkazā vang ngasotnaobingli ngapon ngasak kaje mi chiwui naongarābingwui mik matheithura.
6"Ana ili mibingwui alungli meisum chān sāmihaira, kala imaili machora̱ mashoror kaje mi ngasāhaira. 7Kakhanangwui vang imik māmāchahaira, kala iwui pheipāng saikora khaya̱ kathāna. 8Wuklung khangatarbingna hili matakhakhaira, kala khayon makhalei mina vare makathei mili ngakarthuira. 9Chithālala khangarong mina awui shongfali singtitra, kala pāng kathara kaje china pangmei-pangmei ngasāra.
10"Kha nathum saikora latunglu, arui rālu; nathumwui alungli thangmei mi akhala ina masamphangmana. 11Iwui mirin thuikuphaira, iwui khangarān saza̱haira, kala iwui ningwui ningkachāngbing chila saza̱haira. 12Athumna ngayāli ngashun onkhangasaka; tangkhamangwui mangāli, 'kahor chi ungshungki' da hānga. 13Ina chomli iwui shim khavai chihānakha, tangkhamangli iwui pet hamizatakha, 14chomli, 'Na ishāvāna' da hoakha, kala mathanli, 'Iwui ava̱' kala 'Izarva̱' da hoakha, 15chithākha iwui kachihān kali leikhala? Iwui vang kachihānli khipāna theishapa? 16Chi chom ngaveili tunga? Ithum katonga chifali tungnaora?"
