Bildadna Latluida Hānga
Bildadna sha̱kei thāda khuikahai chiwui vang malungvāta, kala makaphā miwui samkaphang kahāngchingkhai tui eina ngahānkai: kahor chi sāshimithaowa, apheili khailan yonkhuiya, awui angayung akhala maleiluimara. Awui kahāng kachiva̱ hi naongarā chifakathuihai mi akhawuitungli tāya.
18 1Chieina Shuhwui Bildadna ngahānkai: 2"Kayākhashida tui rengrakhala? Ning zanglu, chitharan ithumna ngazeknaosa. 3Khisāda ithumli sei thāda, namiktāli mangkhama̱ da shānkhuikhala? 4Na nawui malungkhavāta nakhalatta serkazama; nawui vang eina okathui horhaora, maningakha lunghār chi apamwui eina nganukra? 5Mha, makhayāwui kahor shimitmihaora, kala awui meiwon mahorluimara. 6Awui shimli kahor tangmangtinghaira, kala awuitungli khalei thaomei shimitmihaora. 7Awui yāng kapang kazat sha̱sang ngasakra, kala awui khalattawui khangarānna ali konglui ngasakra. 8Awui khalattawui pheina ali khalenli mangngasakra, kala ana khalenwui alungli kazata zangra. 9Khalenna awui pheimaja̱li tukkhuira; khalen kasangna ali singtita. 10Awui vang ngaleili khara̱ ngathumda sanghai, kala awui shongfali khalen ali ngaraida lei. 11Khangacheena ali kuimareida machitta, kala ali maron maron shurra. 12Awui yāng kathaina ngazanhaora, kala ana konglui khavai unshimui ngarānhaida lei. 13China awui ahui akaikai chuira; kathiwui naochizaina awui pheipāng chuira. a a v13 "Kathiwui naochizai" kaji hi kashimān kasā, phasā theng ngasak kasā phārrei akha khamathānda hānga tuina — kathiwui khamataia shaokathat kasā chili. 14Awui shimwui nganungkhungpamwui eina ali khuithui, kala khangacheewui awungali ali thānkāhaora. 15Meina awui shimli pamra, chi awui maningluimana; kala meiri kachuina awui shimtungli chairora. 16Awui angayung azingshong thenghaora, kala awui aphāngbing atungshong ngahuihaora. 17Awui phaningung okathuiwui eina shimānhaora, kala chānreili awui ming maleimara. 18Ali kahorwui eina tangkhamangli kashamvāhaora, kala okathuiwui eina kharomvāhaowa. 19Awui mibingwui ngachaili ara̱-azā lah naotun akhala mataimimana, awui rida pamkhavaipamli khipākha maleisāmara. 20Zingtunshongli khaleibingna awui kalākashi chi theilaga matakhakhaira, kala zingshoshongli khaleibingli khangachee khangachāna pemhaira. 21Kachangkhat eina makhayābingwui pamkhavai hi hithāda ngasāra, Vareli makathei miwui apam hina."
