Bildad Sheri Po

Bildade hako teko bi dithelüno mese sü zi do, mu mesakemo thüma tüpü belü fü kela: pü keve cülü kezü thiyito, shepü pü phekapü meta to, mu pü tsa mori pü ye-o ba mote. Mha pe metü hiko, pü nuneko sa khi keta thüma ce tho süva.

Kezhü 18.

Süsa Bildad Shuh shuyemi pü poti die, “No za züpo dipü meri hu bate? Mha seyite, süsa ha kepo tato. Dithelüno hako teko bi thi bate, mu neko mhüjülü hako mesakemoko bi keri bate? No n lekhulü nmhü küdiko kro kemipüe— n saketako cejü khava teshe, mori kütsü utho uthilü müka teshe? Üü, kürüzü keve vesü mota, mu pü me meli ri vesü mota. Keve pü cülü kezü thiyito, mu pü mesoyo metobü menü to. Pü küku ta chota shorüh thiyito, mu pü doko pü sho va to. Pü phe pü khumalü süva to, mu pü süo metsulü chota vo zo. Sümhüdzüe pü phekapülü pütüyi to; shepü pü khapü meta to. Pü saketa cejülü kero shepü revü meta, mu pü revükhilü sümhüdzü süyi meri bate. Lucohicocelü kempe pü pe thi süto, mu pü phekapülü sameji to. Pü küpa tüsa müka va to, mu pü retulü mhakesu dokhriva süyi bate. Pü püni küdiko tiyi to; kethi nurao pü beni koko tiyi to. ^a Pü cü krü kebaposülüno pü kiri to, mu kempe kedeoce püvo to. Me pü cülü ba to, püyo keta tamo; melü metsa pü cü mesoyo süve to. Pü u melüko mekhroco keso to, mu pü pücoko mesoco rügwi to. Pü memo cejülüno müka to, mu shopü sholiko lü pü tho ba mote. Keve lüno kezülü pü huva to, mu cejü hio lüno pü sameji to. Pü thüma dolü pü tsa mori pü ye-o ba mote, pü keba sülü külaküyi mipüri ba mote. Nakroco kebamiko pü mha keta ngo de kemere thi to, mu nathoco kebamiko kempe pütüyi to. Jüo hihi kürüzü cü keta bizo, Jihova se kemopü thethi zo.”