ኢዮብ 18

18 ¹ከዚያም ሹሐዊው ቢልዳድ እንዲህ ሲል መለሰ፦ ²“ቃላትን እስከ መቼ ድረስ ታድናለህ? አስተውል፤ ከዚያም ልንነጋገር እንችላለን። ³እንደ ከብት የምንታይ ለምንድን ነው፣ በዓይንህም ፊት እንደ ሞኝ የተቈጠርን? ⁴አንተ በቍጣህ ራስህን የምትበጣጥስ፣ ምድር ስለ አንተ ትተዋለችን? ወይስ ቋጥኝ ከስፍራው ይነቀላልን? ⁵አዎን፣ የክፉ ሰው ብርሃን ይጠፋል፤ የእሳቱም ነበልባል ይጨልማል። ⁶በድንኳኑ ውስጥ ብርሃን ይጨልማል፤ በላዩም ያለው መብራት ይጠፋል። ⁷ብርቱ ርምጃዎቹ ይቋረጣሉ፤ የገዛ ምክሩም ይጥለዋል። ⁸የገዛ እግሮቹ ወደ መረብ ይነዱታል፤ ቀጥታም ወደ ወጥመዱ ዘልቆ ይረማመዳል። ⁹ወጥመድ በተረከዙ ይይዘዋል፤ ወጥመድም አጥብቆ ይይዘዋል። ¹⁰ለእርሱ በመሬት ውስጥ ገመድ ተደብቋል፤ በመንገዱም ላይ ወጥመድ ተዘርግቶ ይጠብቀዋል። ¹¹ድንጋጤ በየአቅጣጫው ያስደነግጠዋል፤ ከተረከዙም እየተከተለ ያባርረዋል። ¹²ጕልበቱ በራብ ይመነምናል፤ መከራም ለውድቀቱ ተዘጋጅቶ ይጠብቃል። ¹³የቈዳውን ቍራጭ ይበላል፤ የሞት በኵርም እጅ እግሩን ይበላል። ^a a v13 “የሞት በኵር” የሚለው ለሚገድል፣ አካልን ለሚያመነምን በሽታ — ለሞት እጅግ ኀያል መሣሪያ የተነገረ ግጥማዊ አነጋገር ነው። ¹⁴ተማምኖ ከሚኖርበት ድንኳኑ ተነቅሎ ይወጣል፤ ወደ ድንጋጤም ንጉሥ ይነዳል። ¹⁵እሳት በድንኳኑ ይሰፍራል፤ ድንኳኑም ከእንግዲህ የእርሱ አይደለም፤ የሚነድ ዲንም በቤቱ ላይ ይበተናል። ¹⁶ከታች ሥሮቹ ይደርቃሉ፤ ከላይም ቅርንጫፎቹ ይጠወልጋሉ። ¹⁷መታሰቢያው ከምድር ይጠፋል፤ በአደባባይም ስም የለውም። ¹⁸ከብርሃን ወደ ጨለማ ይገፈተራል፤ ከዓለምም ይባረራል። ¹⁹በሕዝቡ መካከል ዘርም ሆነ ትውልድ አይተውም፤ ቀድሞ በኖረበትም ስፍራ የተረፈ የለም። ²⁰በምዕራብ ያሉት በዕጣ ፈንታው ይደነግጣሉ፤ በምሥራቅ ያሉትም በፍርሃት ይያዛሉ። ²¹በእውነት የክፉዎች መኖሪያ የሚደርስበት ይህ ነው፤ እግዚአብሔርን የማያውቅ ሰው ስፍራም ይህ ነው።”