Mi eng' bukuit
Bukuit

Ng'alaali Bildad Agaigai

Wechei Bildad ye kiyachin ko uu tuuga, ak kowol eng' ng'aleek che kagoyong'oot agobo kagesunetap kiptengeginik: koibeti lapkeiyet, konam mesteet kwaryat, ak ma koletu iyoteet. Butyi kaboorunosyechooto tugul chiito ne agoi ra kagokitup lagokyik.

Sura 18.

Kowol anyun Bildad ne po Shua, kole: “Agoi ano ye icheeng'ei ng'aleek? Iboor utaatyet, si keng'alaal. Amu nee si kiyachech ko uu tuuga, kegesyech ko kibionik eng' taing'ung'? Inyee ne tuatuigei eng' nereegeguk—tos kipagaakta emet agobo inyee, anan kibesyo koito komong' eng' komostanyi? Ee, beetei lapkeiyetap kiptengeginik, ak koma lalei kogeny liplibenetap maatnyi. Egu lapkeiyet mesundeito eng' meng'ootennyi, ak kobeeti konda ne mi barakyik. Kinyigiisen kakwautik che kiimeen, ak kobutyi ineendet kirwoogutikyik. Imutyi keelyekyik ineegei eng' regereiywot, ak kobendi eng' meshenyi. Namei mesteet kwaryannyi; ak konam ineendet kirokto kot kogimit. Kiuny rogoet agobo ineendet eng' ng'wony, ak komi mesteet koriibei eng' ooreennyi. Iywei ineendet kwang'utik eng' komosta age tugul, ak koonei koosubi keelyekyik. Amei rubeet kimnateennyi, ak kotonon kiy ne ya ko tetat agobo ye putei. Amei komoswegap sorwennyi; amei kitaapsomoktap meet mulonokyik. a a v13 "Kitaapsomoktap meet" ko ng'olyootap tienik ne boorune miondo ne barunoot ne meesune poorto — ne barunoot miising' eng' meet. Kiwirtae ineendet eng' kaalyeet ne mi meng'ootennyi, ak kiibei ineendet kobun ole mi laitoryatap kwang'utik. Menyei maat eng' meng'ootennyi, ne ma po ineendet kogeny; kiyesta koik che laldos che lalei eng' koonnyi. Yaamei rootikyik eng' ng'wony, ak koresyo moriikyik eng' parak. Beetei kabwaatennyi eng' ng'wony, ak ma tinyei kainet eng' ortinwek. Kiterter ineendet komong' eng' lapkeiyet konyo mesundeito, ak koonei komong' eng' ng'wony. Ma pagakyi lagok anan iyoteet eng' piikyik, ma mi chii ne ng'et ole ki menyei ineendet. Kwong'yo piik che mi ole koiyei asiista agobo kasunennyi, ak konam iywek piik che mi ole kong'etune asiista. Iman kole ni ko ne egu meng'ootetap kiptengeginik, komostanyi chiito ne ma ingen Kamuktaindet.”