Misera Ninglumbing
Jobna athumli, nathum ningnganung ngasak mangashapa misera, da hānga, kala athumwui pamli I leisāsi kaja ilala tui kachungkha hāngshapra da hānga. Varena raikapinga akha thāda ikahungli yonkhuilaga ili rinnganao khavai sai da ana hānga. Chithālala ana hānga, iwui shākhi kazingli lei.
16 1Chieina Jobna ngahānkai: 2"Hikathā kachungkha ina shāhaira; nathum saikora misera ninglumbing ngasāhaira. 3Nawui arema tuiwui katang maleimala? Khina nali malungvāt ngasakta na ngahānkakā china? 4Nathum iwui pamli leiakha, inala nathum thāda matui samphangra; ina nathumli mamayāmada tui ngarumda sang samphangra kala nathumli ikui khayitra. 5Kha ina ikhamorna nathumli pangngasakra, kala imorchaiwui ningluma nawui kachot vānngasakra. 6Ina matui tharan, iwui kachot mavāngasakmana; kala ina minarhaoakha, khina iwui eina thuihao? 7Ara Varena kachangkhata ili chotngasakhaira; nana iwui ngasotnao saikora sākazamhaira. 8Nana ili nganarshān ngasakhaira, kala chi shākhi ngasāhaira; iwui ara̱kuimāngna iwuitungli kharshoka, kala iwui mangāli shākhi mi. 9Awui malungkhavātna ili tāhaira kala ili ngararhaira; ana ahā ili tarichithei; iwui yangkashena ili amik tāshungda yanga. 10Mibingna athumwui khamorna ili mana̱shida zeihaira; mana̱kashi eina iwui maisorli ngaphitahaira; athum iwuitungli ngarumda khuma. 11Varena ili makhangarongawui pāngli tāhaira, kala makhayāwui pāngli ili tāzanghaira. 12I okthuida leisai, kala ana ili sākazamhaira; ana ikahungli ili singkhuida ngaphitkazam ngasakhaira; ili awui pāntam ngasakhaira. 13Awui malā kasingabingna ili kuinama; ana lukhamashan maleila iwui amakei za̱serhaira kala iwui athi ngaleili heirorhaira. 14Ana ili kashao thakta kashaona sākazamhaira; ana raimi akha thāda ili yongkharokra. 15Ina iwui phasāli bora ngavaihaira, kala iwui khavei chifali chizanpaira. 16Chappalak eina iwui mai machāhaira, kala tangmangting kahai imikphungli lei, 17iwui pāngli khangashao kahai maleilala kala iwui seihā kasā tharzā ngasai. 18O okathui, iwui ashee mathumalu, kala iwui khavaona ngasām khavaipam masamphangaranu. 19Aruila, iwui shākhi kazingramli lei, kala iwui vang phayetkhame kajuipamli lei. 20Iwui ngasotnaobingna ili mana̱kashi sai; imikna Varewui mangāli chāra̱ longa, 21Miwui naomayarana awui khongnaiwui vang phayetmi thāda, ana mi akhawui vang Varewui mangāli phayetmiranu. 22Kaja zingkum kateokha maningla peihaira, kala chiwui thili ina maokthuiluipam shongfali vāra."
