ኢዮብ 16

16 ¹ኢዮብም እንዲህ ሲል መለሰ፦ ²“እንደ እነዚህ ያሉ ብዙ ነገሮችን ሰምቻለሁ፤ ሁላችሁም የምታስጨንቁ አጽናኞች ናችሁ። ³ከንቱ ለሆነ ቃላችሁ ፍጻሜ የለውምን? መመለስን እንድትቀጥሉ የሚያነሣሣችሁ ምንድን ነው? ⁴እናንተ በእኔ ስፍራ ብትሆኑ ኖሮ፣ እኔም እንደ እናንተ መናገር እችል ነበር፤ በእናንተ ላይ ቃላትን አያይዤ ራሴን በእናንተ ላይ መንቅነቅ እችል ነበር። ⁵ነገር ግን በአፌ አበረታችሁ ነበር፤ የከንፈሮቼም መጽናናት ሥቃያችሁን ያቀል ነበር። ⁶ብናገር ሥቃዬ አይቀልም፤ ዝም ብልም ከእኔ የሚለይ ምንድን ነው? ⁷አሁንም በእርግጥ እግዚአብሔር አድክሞኛል፤ ቤተ ሰቤን ሁሉ አጠፋህብኝ። ⁸አመጠጥኸኝ፣ ይህም ምስክር ሆነ፤ ከሳቴም በእኔ ላይ ተነሥቶ ፊት ለፊቴ ይመሰክርብኛል። ⁹ቍጣው ቀዶኛል፣ ወግቶኛልም፤ ጥርሱን አፋጨብኝ፤ ጠላቴ ዐይኑን ተከለብኝ። ¹⁰ሰዎች አፋቸውን በእኔ ላይ ከፈቱ፤ ለማዋረድ ጕንጬን መቱ፤ በእኔ ላይ ተባብረው ተነሡ። ¹¹እግዚአብሔር ለዐመፀኞች አሳልፎ ሰጠኝ፤ ወደ ክፉዎችም እጅ ጣለኝ። ¹²ረጥቼ ነበር፣ እርሱ ግን ሰባበረኝ፤ ዐንገቴን ይዞ ድቅቅ አድርጎ ሰባበረኝ፤ ዒላማውም አድርጎ አቆመኝ። ¹³ቀስተኞቹ ከበቡኝ፤ ያለ ርኅራኄ ኵላሊቴን ቀዳደደ፤ ሐሞቴንም በምድር ላይ አፈሰሰ። ¹⁴መቶ መልሶ በመምታት ይሰብረኛል፤ እንደ ተዋጊ ይሮጥብኛል። ¹⁵በቍርበቴ ላይ የሐዘን ልብስ ሰፋሁ፤ ግንባሬንም በትቢያ ውስጥ ቀበርሁ። ¹⁶ፊቴ ከልቅሶ የተነሣ ቀልቷል፤ በዐይኔ ሽፋሽፍትም ላይ ጥቅጥቅ ያለ ጨለማ ተኝቷል፤ ¹⁷ይህም ሆኖ በእጆቼ ዐመፅ የለም፤ ጸሎቴም ንጹሕ ነው። ¹⁸ምድር ሆይ፣ ደሜን አትሸፍኚ፤ ጩኸቴም የሚያርፍበት ስፍራ አይኑረው። ¹⁹አሁንም ቢሆን ምስክሬ በሰማይ ነው፤ ተሟጋቼም በላይ ነው። ²⁰ወዳጆቼ ይንቁኛል፤ ዐይኔ ወደ እግዚአብሔር እንባን ያፈሳል፤ ²¹የሰው ልጅ ስለ ባልንጀራው እንደሚማልድ፣ እርሱ ስለ ሰው በእግዚአብሔር ፊት ይማልድ ዘንድ ነው። ²²ጥቂት ዓመታት ብቻ ያልፋሉና፣ ከዚያም የማይመለስበትን መንገድ እሄዳለሁ።”