Jobu 16

16 ¹Nígbà náà ni Jobu dáhùn pé: ²“Mo ti gbọ́ ohun púpọ̀ tí ó jọ ìwọ̀nyí; olùtùnú aláìníláárí ni gbogbo yín. ³Ṣé kò sí òpin sí àwọn ọ̀rọ̀ ẹ̀fúùfù yín? Kí ni ó ń rú yín sókè tí ẹ fi ń bá a nìṣó ní dídáhùn? ⁴Èmi pẹ̀lú lè sọ̀rọ̀ bí ẹ̀yin ti ń ṣe, bí ẹ̀yin bá wà ní ipò mi; mo lè kó àwọn ọ̀rọ̀ jọpọ̀ lòdì sí yín, kí n sì mi orí mi sí yín. ⁵Ṣùgbọ́n èmi ìbá fi ẹnu mi fún yín ní okun, ìtùnú ètè mi ìbá sì mú kí ìrora yín fúyẹ́. ⁶Bí mo bá sọ̀rọ̀, ìrora mi kò fúyẹ́; bí mo bá sì dákẹ́, kí ni ó fi mí sílẹ̀? ⁷Nítòótọ́ nísinsìnyí Ọlọ́run ti rẹ̀ mí dànù; ìwọ ti sọ gbogbo àwùjọ mi di ahoro. ⁸Ìwọ ti mú mi rọ gbẹ, ó sì ti di ẹlẹ́rìí; rírù ara mi dìde lòdì sí mi, ó sì jẹ́rìí sí mi lójú. ⁹Ìbínú rẹ̀ ti fà mí ya, ó sì ti kọlù mí; ó ti pa eyín rẹ̀ keke sí mi; ọ̀tá mi tẹ ojú rẹ̀ mọ́ mi. ¹⁰Àwọn ènìyàn ti ya ẹnu wọn sí mi; wọ́n ti gbá mi lẹ́rẹ̀kẹ́ ní ìfiniṣẹ̀sín; wọ́n kó ara wọn jọ lòdì sí mi. ¹¹Ọlọ́run fi mí lé àwọn aláìṣòdodo lọ́wọ́, ó sì sọ mí sínú ọwọ́ àwọn ẹni ibi. ¹²Mo wà ní ìrọ̀rùn, ó sì fọ́ mi; ó di mi ní ọrùn mú, ó sì gbá mi fọ́ túútúú; ó ti fi mí ṣe àfojúsùn rẹ̀. ¹³Àwọn tafàtafà rẹ̀ yí mi ká; ó la kíndìnrín mi sílẹ̀ ní àìláàánú, ó sì tú òróòro mi dà sí ilẹ̀. ¹⁴Ó ń fọ́ mi pẹ̀lú ìlù lórí ìlù; ó sáré wá bá mi bí jagunjagun. ¹⁵Mo ti rán aṣọ ọ̀fọ̀ bo awọ ara mi, mo sì ti sin iwájú orí mi sínú erùpẹ̀. ¹⁶Ojú mi ti pọ́n fún ẹkún, òjìji tí ó jìn sì wà lórí ìpéǹpéjú mi, ¹⁷bí ó tilẹ̀ jẹ́ pé kò sí ìwà ipá ní ọwọ́ mi, àdúrà mi sì jẹ́ mímọ́. ¹⁸Ìwọ ayé, má ṣe bo ẹ̀jẹ̀ mi mọ́lẹ̀, kí igbe mi má sì rí ibi ìsinmi. ¹⁹Àní nísinsìnyí, ẹlẹ́rìí mi ń bẹ ní ọ̀run, alágbàwí mi sì wà ní òkè ọ̀run. ²⁰Àwọn ọ̀rẹ́ mi fi mí ṣẹ̀sín; ojú mi ń da omijé sílẹ̀ sí Ọlọ́run, ²¹kí ó lè rawọ́ ẹjọ́ ènìyàn níwájú Ọlọ́run, gẹ́gẹ́ bí ọmọ ènìyàn ti ń rawọ́ fún aládùúgbò rẹ̀. ²²Nítorí ọdún díẹ̀ péré ni yóò kọjá, nígbà náà ni èmi yóò sì rìn ọ̀nà tí a kì í padà wá mọ́.”