ايُوب 16 FHB Father's Heart Bible™

16 ¹بيا ايوب جواب ورکړو چې، ²”ما د دې په شان ډېرې خبرې اورېدلې دى؛ تاسو ټول بدبخته تسلى ورکوونکى ياست. ³ستا د بادي خبرو پاے نشته؟ څۀ شى دې مجبوره کوى چې تۀ همېشه جواب ورکوې؟ ⁴زۀ هم ستا په شان خبرې کولے شم، کۀ تۀ زما په ځائ کښې وې؛ زۀ ستا خلاف خبرې سره جوړولے شم او تا ته سر خوزولے شم. ⁵خو زۀ به تا د خپلې خولې په وسيله زړۀ ورکوم، او زما د شونډو تسلى به ستا درد کم کړى. ⁶کۀ زۀ خبرې وکړم، زما درد کم نۀ شى؛ او کۀ زۀ چپ شم، نو څۀ شى زما نه ليرې کيږى؟ ⁷يقيناً اوس خُدائ پاک زۀ ستړے کړے يم؛ تا زما ټوله ډله برباد کړې ده. ⁸تا زۀ وچ کړے يم، او دا ګواه شوے دے؛ زما لاغري زما خلاف پاڅيږى او زما په مخ کښې ګواهى ورکوى. ⁹د هغۀ غضب زۀ څيرلے يم او حمله يې راباندې کړې ده؛ هغۀ خپل غاښونه راباندې کرېچلى دى؛ زما دُشمن خپلې سترګې په ما ايښې دى. ¹⁰خلقو خپلې خولې په ما پرانستلې دى؛ د سپکاوى په طور يې زما مخ ته څپيړه راکړې ده؛ هغوئ زما خلاف يو ځائ ¹¹خُدائ پاک زۀ ظالمانو ته سپارى او د بدکارانو په منګولو کښې مې اچوى. ¹²زۀ آرامه وم، او هغۀ زۀ مات کړم؛ د غاړې نه يې ونيولم او ټوټې ټوټې يې کړم؛ هغۀ زۀ د خپلې نښانې په توګه ودرولم. ¹³د هغۀ تير‌اندازان زۀ راچاپېره کوى؛ هغه بې‌رحمه زما ګُردې څيرى او زما زهره په زمکه توئوى. ¹⁴هغه زۀ په ضربه پسې ضربه ماتوى؛ د يو جنګياليى په شان راباندې حمله کوى. ¹⁵ما د خپلې پوستکى په سر د ماتم جامې ګنډلې دى او خپله تندے مې په خاورو کښې ښخ کړے دے. ¹⁶زما مخ د ژړا نه سور شوے دے، او زما د سترګو په پاڼو باندې ژور سيورے پروت دے، ¹⁷اګرچې زما په لاسونو کښې هيڅ ظلم نشته او زما دُعا پاکه ده. ¹⁸اے زمکې، زما وينه مۀ پټوه، او زما فرياد دې د آرام هيڅ ځائ ونۀ مومى. ¹⁹اوس هم، زما ګواه په آسمان کښې دے، او زما وکيل په اوچت ځائ کښې دے. ²⁰زما ملګرى په ما مسخرې کوى؛ زما سترګې خُدائ پاک ته اوښکې تويوى، ²¹چې هغه به د يو انسان دپاره د خُدائ پاک په حضور کښې وکالت وکړى، ²²ځکه چې يواځې څو کاله به تېر شى، او بيا به زۀ هغه لار ته لاړ شم چې بيرته راتګ نشته.“