Ayubu 16

16 ¹Ndipo Ayubu akajibu: ²"Nimeyasikia mambo mengi kama haya; ninyi nyote ni wafariji wenye kuudhi. ³Je, hakuna mwisho wa maneno yenu yasiyo na maana? Ni nini kinachokuchokoza hata uendelee kujibu? ⁴Mimi nami ningeweza kunena kama ninyi, kama ninyi mngekuwa mahali pangu; ningeweza kufungamanisha maneno dhidi yenu na kuwatikisia kichwa changu. ⁵Lakini ningewatia nguvu kwa kinywa changu, na faraja ya midomo yangu ingepunguza maumivu yenu. ⁶Ninaponena, maumivu yangu hayapunguki; nami ninaponyamaza, ni nini kinachoniondokea? ⁷Hakika sasa Mungu amenichosha; umeliharibu kabisa kundi langu lote. ⁸Umeninyausha, na jambo hilo limekuwa shahidi; ukonde wangu unainuka juu yangu na kunishuhudia usoni pangu. ⁹Hasira yake imenirarua na kunishambulia; amenisagia meno yake; adui yangu ananikazia macho yake. ¹⁰Watu wamenifumbulia vinywa vyao; wamenipiga shavu kwa dharau; wanashikamana pamoja dhidi yangu. ¹¹Mungu ananitia mikononi mwa wasio na haki na kunitupa katika mtego wa waovu. ¹²Nilikuwa na raha, naye akanivunja vunja; alinishika shingoni na kunipasua vipande vipande; amenisimamisha niwe shabaha yake. ¹³Wapiga mishale wake wamenizunguka; anazipasua figo zangu bila huruma na kuimwaga nyongo yangu chini. ¹⁴Ananivunja kwa pigo baada ya pigo; ananishambulia kama shujaa wa vita. ¹⁵Nimeshona nguo za maombolezo juu ya ngozi yangu, na kuuzika uso wangu mavumbini. ¹⁶Uso wangu umewekwa wekundu kwa kulia, na kivuli kizito kimekaa juu ya kope zangu, ¹⁷ingawa hakuna dhuluma mikononi mwangu, na maombi yangu ni safi. ¹⁸Ee nchi, usiifunike damu yangu, na kilio changu kisipate mahali pa kupumzika. ¹⁹Hata sasa, shahidi wangu yuko mbinguni, na mtetezi wangu yuko juu. ²⁰Rafiki zangu wananidharau; jicho langu linamwagia Mungu machozi, ²¹ili atetee shauri la mtu mbele za Mungu, kama mwana wa Adamu anavyomtetea jirani yake. ²²Kwa maana miaka michache tu itapita, kisha nitaiendea njia ile isiyo na kurudi."