Job 16

16 ¹Unya mitubag si Job: ²“Daghan na akong nadungog nga sama niini; kamong tanan mga maghuhupay nga walay pulos. ³Wala bay kataposan ang inyong mga pulong nga hinungaw? Unsay nagtukmod kaninyo nga nagpadayon kamo sa pagtubag? ⁴Ako usab makasulti sama kaninyo, kon kamo pa ang ania sa akong dapit; makatigom ako ug mga pulong batok kaninyo ug lingolingohon ko ang akong ulo diha kaninyo. ⁵Apan lig-onon ko kamo pinaagi sa akong baba, ug ang paghupay sa akong mga ngabil makapakunhod sa inyong kasakit. ⁶Kon mosulti ako, dili mamenos ang akong kasakit; ug kon mohilom ako, unsay mobiya kanako? ⁷Sa pagkatinuod karon gikapoy na ako sa Dios; gilaglag mo ang tanan kong mga kauban. ⁸Gikunot mo ako, ug kini nahimong usa ka saksi; ang akong kaniwang mitindog batok kanako ug nagpamatuod sa akong nawong. ⁹Gikuniskunis ako sa iyang kasuko ug gidagmalan; mikagot ang iyang mga ngipon batok kanako; gitutokan ako sa akong kaaway sa iyang mga mata. ¹⁰Ginganga sa mga tawo ang ilang mga baba kanako; gisagpa nila ang akong aping agig pagbiaybiay; nagtapok sila batok kanako. ¹¹Gitugyan ako sa Dios ngadto sa mga dili matarong ug gilabay ngadto sa mga kamot sa mga daotan. ¹²Anaa ako sa kalinaw, ug gidugmok niya ako; gigunitan niya ako sa liog ug gipusdak; gipahimutang niya ako ingon nga iyang igpapana. ¹³Ang iyang mga magpapana naglibot kanako; gilapa niya ang akong mga amimislon nga walay kaluoy ug gibubo niya ang akong apdo sa yuta. ¹⁴Gibungkag niya ako pinaagi sa sunodsunod nga hampak; midasmag siya kanako sama sa usa ka manggugubat. ¹⁵Gitahi ko ang bisti sa pagbangotan ibabaw sa akong panit ug gilubong ko ang akong agtang sa abog. ¹⁶Mipula ang akong nawong tungod sa paghilak, ug ang halalom nga landong nahimutang sa akong mga tabontabon, ¹⁷bisan walay kapintasan sa akong mga kamot ug putli ang akong pag-ampo. ¹⁸Yuta, ayaw taboni ang akong dugo, ug ayaw tugoti nga makakaplag ug pahulayanan ang akong pagtuaw. ¹⁹Bisan karon, ang akong saksi atua sa langit, ug ang akong manlalaban atua sa kahitas-an. ²⁰Gibiaybiay ako sa akong mga higala; ang akong mata nagbubo ug mga luha ngadto sa Dios, ²¹aron iyang ilaban ang kaso sa usa ka tawo atubangan sa Dios, sama sa usa ka anak sa tawo nga nagpakilooy alang sa iyang silingan. ²²Kay pipila na lamang ka tuig ang molabay, ug unya moadto ako sa dalan nga walay balikanan.”