UJobe 17

17 ¹“Umoya wami uphukile, izinsuku zami zicishiwe, ithuna selingilungele. ²Ngempela abangiklolodelayo bangizungezile, namehlo ami awakwazi ukuyeka ukubukela ukungiklolodela kwabo.

³“Ngibekele isibambiso kuwe ngokwakho; ngubani omunye ongaba ngumqinisekisi wami? ⁴Ngokuba uyivalile ingqondo yabo ukuba ingaqondi; ngakho-ke ngeke ubavumele ukuba banqobe. ⁵Lowo oceba abangane bakhe ngenxa yenzuzo—amehlo abantwana bakhe ayakufiphala.

⁶“Ungenze ngaba yisaga phakathi kwabantu, umuntu abamkhafulela amathe ebusweni. ⁷Iso lami lifiphele ngenxa yosizi, nezitho zami zonke zinjengethunzi. ⁸Abaqotho bashaqekile ngalokhu, nomsulwa uvukela ongenaNkulunkulu. ⁹Kodwa olungileyo ubambelela endleleni yakhe, nonezandla ezihlanzekile uya eqina ngokwengeziwe.

¹⁰“Kodwa buyani, nina nonke, wozani manje—angitholi namunye ohlakaniphile phakathi kwenu. ¹¹Izinsuku zami sezidlulile, amacebo ami aphukile, kanye nazo izifiso zenhliziyo yami. ¹²Baphendula ubusuku bube yimini; ‘ukukhanya,’ basho, ‘kuseduze’—ebusweni bobumnyama. ¹³Uma ngithemba ithuna libe yindlu yami, uma ngendlala umbhede wami ebumnyameni, ¹⁴uma ngibiza umgodi, ngithi, ‘Wena ungubaba,’ nasempethwini, ngithi, ‘Mama wami’ ‘nodadewethu,’ ¹⁵pho-ke, liphi ithemba lami? Ngubani ongabonela mina ithemba? ¹⁶Liyakwehlela emasangweni ethuna na? Siyakwehlela ndawonye othulini na?”