Solomonwui Laa 7

7 ¹Napheiwui pheihopli teokha khamathā, wungnaowui naongalāva̱! Nakhaishāngwui seikui chāra̱-chāsān thai, them kathema kahakvawui pāng eina sākahai ot thai. ²Nawui wukmarak koklui seikui thai, drakhāra̱ manāt kahai chi katang mavaimana. Nawuk kehu shunkahai, timrāwon eina ngawutphina. ³Nasungthei seichuinaowui ngashirkatā chaonao khani thai. ⁴Nakahung mafahā dolan thai. Namik Bath-rabbimwui ngaveili, Heshbonli khalei ra̱khong thai. Nanātāng Damascusli yangda khalei Lebanonwui dolan thai. ⁵Nakui Carmel Kaphung thai, kala nakuisam hungrisi thai; samnao ngachaili awunga tukthuihaira. ⁶Iwui leikashiva̱, nawui ningyāng ung saikora eina na kayākha mathāli, kala kayākha leishiri! ⁷Naphasā khaneirong thai, kala nasungthei chiwui amazān thai. ⁸Ina hānga, "Ina khaneirongli kāra kala chiwui athei tukkhuira." Nasungthei drakhārongwui amazān tharanu, kala nakhakkhāwui anganam theithukthei tharanu, ⁹kala nakhamor drakhāra̱ mathāmeikap kaji thai. Iwui leikashewui vang chi mangkasang eina longshoka, morchai kala hā tungli khuisang eina longkashoka.

¹⁰I hi iwui leikashiawuina, kala awui kaphaning iwuili lei. ¹¹Thuilu, iwui leikashe, ini luili vāda kha̱bingli pisanghaosa. ¹²Drakhārong ashon shokphokhairakhala da, awon wonhairakhala da, kala kabothei wonphokhairakhala da yangkhavai, ngathorthak eina drakhā yāmguili vāhaosa. Chili ina nali iwui leikashi mira. ¹³Mandrakebingna athumwui anganam shoka, kala iwui leikashe, ina nawui vang kaziphaikahai athei mathāmeikap kaji saikora, kadhar kala haikahai, iniwui khāmong tungli lei. ^a a v13 Mandrake chi achālakhawui okathuili leishāt kachāng sakphokhai kala nao pharā khavai pangshap ngasak da mi kachungkhana shitkasang kahai nganamkaphā thingnahyur bingna.