Sy begeerte is na my
Die man prys haar van haar voete in sandale tot by haar hare en verlustig hom openlik in haar. Sy weer dit nie af nie. Sy noem die begeerte wedersyds en haar eie, en lei hom dan uit na die wingerde en dorpe, waar sy vrugte vir hom bewaar het.
7 1Hoe mooi is jou voete in sandale, edel dogter! Die welwings van jou dye is soos juwele, die werk van ’n meesterkunstenaar se hande. 2Jou nawel is ’n ronde beker wat nooit aan gemengde wyn ontbreek nie. Jou buik is ’n hoop koring omring met lelies. 3Jou twee borste is soos twee jong takbokkies, die tweeling van ’n gasel. 4Jou nek is soos ’n toring van ivoor. Jou oë is poele in Gesbon, by die poort van Bat-Rabbim. Jou neus is soos die toring van Libanon wat na Damaskus toe kyk. 5Jou hoof kroon jou soos Karmel, en jou golwende hare is soos purper; ’n koning word gevange gehou in die lokke daarvan. 6Hoe mooi en hoe lieflik is jy, my liefste, met al jou bekoorlikhede! 7Jou gestalte is soos ’n palmboom, en jou borste soos sy trosse. 8Ek het gesê: “Ek sal die palmboom klim en sy vrugte gryp.” Mag jou borste wees soos trosse van die wingerdstok, en die geur van jou asem soos appels, 9en jou mond soos die beste wyn. Dit vloei glad vir my beminde, en gly saggies oor lippe en tande.
10Ek behoort aan my beminde, en sy begeerte is na my. 11Kom, my beminde, kom ons gaan uit na die veld toe en oornag in die dorpe. 12Kom ons gaan vroeg na die wingerde en kyk of die wingerdstokke gebot het, of die bloeisels oopgegaan het en die granate in bloei is. Daar sal ek jou my liefde gee. 13Die liefdesappels gee hulle geur af, en oor ons deure is al die beste vrugte, nuwes en oues, wat ek vir jou opgegaar het, my beminde. a a v13 Liefdesappels was geurige plante wat in die antieke wêreld algemeen beskou is as plante wat romantiese begeerte prikkel en vrugbaarheid bevorder.
