Ang Iya Handum Yara sa Akon
Gindayaw sia sang lalaki halin sa iya mga tiil nga may sandalyas tubtob sa iya buhok, hayag nga nagakalipay sa iya. Wala niya ini ginlikawan. Ginpanag-iya niya ang handum nga ila duha kag iya man, dayon gindala niya sia sa mga ubasan kag mga baryo, diin may ginsapupo sia nga mga bunga para sa iya.
7 1Daw ano katahum sang imo mga tiil nga may sandalyas, dungganon nga anak nga babayi! Ang mga liko sang imo mga paa daw mga alahas, ang binuhatan sang mga kamot sang isa ka batid nga manug-obra. 2Ang imo pusod daw isa ka malingin nga yahong nga wala gid nagakakulang sing sinimbog nga alak. Ang imo tiyan daw tinumpok nga trigo nga ginlibutan sing mga liryo. 3Ang imo duha ka suso daw duha ka bataon nga usa, kapid sang isa ka gasela. 4Ang imo liog daw isa ka torre nga garing. Ang imo mga mata daw mga punong sa Hesbon, sa luyo sang gawang sang Bat-rabim. Ang imo ilong daw ang torre sang Libano, nga nagatan-aw padulong sa Damasco. 5Ang imo ulo nagapurungkong sa imo daw ang Carmel, kag ang imo nagailig nga buhok daw purpura; ang isa ka hari nabihag sa mga sinalapid sini. 6Daw ano katahum kag daw ano ka makalilipay sa imo, hinigugma, upod ang tanan mo nga mga kalipayan! 7Ang imo tindog daw isa ka palmera, kag ang imo mga suso daw ang mga pungpong sini. 8Nagsiling ako, “Taklaron ko ang palmera kag ugpon ko ang bunga sini.” Kabay nga ang imo mga suso mangin daw mga pungpong sang ubas, kag ang kaamyon sang imo ginhawa daw mga mansanas, 9kag ang imo baba daw ang pinakamaayo nga alak. Nagailig ini sing mahinay para sa akon hinigugma, nga nagaalisngaw sing malum-ok sa mga bibig kag mga ngipon.
10Iya ako sang akon hinigugma, kag ang iya handum yara sa akon. 11Kari ka, akon hinigugma, maglakat kita sa kaumhan kag magpalipas sang gab-i sa mga minuro. 12Magkadto kita sing aga pa sa mga ulubasan kag tan-awon naton kon nagpamukad na bala ang mga ubas, kon nagbukad na bala ang mga bulak kag kon nagapamulak na ang mga granada. Didto ihatag ko sa imo ang akon paghigugma. 13Ang mga mandragora nagapanghaplas sang ila kaamyon, kag sa ibabaw sang aton mga gawang yara ang tanan nga pinakamaayo nga mga bunga, bag-o kag daan, nga gintigana ko para sa imo, akon hinigugma. a a v13 Ang mga mandragora amo ang maamyon nga mga tanom nga ginapatihan sang kadamuan sa dumaan nga kalibutan nga nagapukaw sang gugma kag nagapauswag sang pagkamabungahon.
