Nĩ Niĩ Eeriragĩria

Mũndũ mũrũme amũgooca kuuma magũrũ make marĩ iraatũinĩ nginya njuĩrĩ yake, akĩonania na ũtheri atĩ nĩakenagio nĩwe. Nake ndaregana nacio. Oiga atĩ merirĩria macio nĩ ma eerĩ na nĩ make, agacooka akamũtongoria mĩgũndainĩ ya mĩthabibũ na tũtũũrainĩ, kũrĩa aamũigĩire maciaro.

Gĩcunjĩ 7.

Kaĩ magũrũ maku marĩ iraatũinĩ nĩ mathaka-ĩ, wee mwarĩ wa mũnene! Mĩthiorano ya ciero ciaku ĩhaana ta mathaga, wĩra wa moko ma mũtugi mũũgĩ. Mũkonyo waku nĩ mbakũri njũũ ĩrĩa ĩtaagaga ndibei ĩrĩa ĩtukanĩte. Nda yaku nĩ kĩrundo kĩa ngano gĩthiurũrũkĩirio nĩ mahũũa. Nyondo ciaku cierĩ ihaana ta tũgwarũ twĩrĩ, mahatha ma thwariga. Ngingo yaku ĩhaana ta mũthiringo wa mũguongo. Maitho maku nĩ tũria twa Heshiboni, hakuhĩ na kĩhingo kĩa Bathi-rabimu. Iniũrũ rĩaku rĩhaana ta mũthiringo wa Lebanoni, rĩrorete Dameski. Mũtwe waku ũkũgemetie ta Karimeli, nayo njuĩrĩ yaku ĩrĩa ĩrĩ taarĩ ĩhaana ta rangi wa ndathi; mũthamaki nĩohetwo nĩ mĩrĩga ya njuĩrĩ ĩyo. Kaĩ ũrĩ mũthaka na mwega mũno, wee mwendwa, hamwe na gĩkeno gĩaku gĩothe! Mũhianĩre waku ũhaana ta mũtende, nacio nyondo ciaku ihaana ta imanjaũ ciaguo. Ndoigire atĩrĩ, “Nĩngũhaica mũtende, nyiite maciaro maguo.” Nyondo ciaku irohaana ta imanjaũ cia mũthabibũ, naguo mũtararĩko wa mĩhũmũ yaku ũhaane ta matunda, nako kanua gaku gatuĩke ta ndibei ĩrĩa njega mũno. Ĩtherũkaga wega ĩgĩthiĩ kũrĩ mwendwa wakwa, ĩgĩtherera hũũthũ igũrũ rĩa mĩromo na magego.

Niĩ ndĩ wa mwendwa wakwa, naguo weerirĩa wake ũrĩ harĩ niĩ. Ũka, wee mwendwa wakwa, nĩtuumagare tũthiĩ mĩgũndainĩ, tũraare matuurainĩ. Nĩtũrooke tene mĩgũndainĩ ya mĩthabibũ, tuone kana mĩthabibũ nĩĩthundũkĩte, kana mahũũa nĩmatumũkĩte, na makomamanga nĩmarutĩte mahũũa. Kũu nĩkuo ngaakũhe wendo wakwa. Mĩmandareki nĩĩraruta mũtararĩko wayo, na igũrũ rĩa mĩrango iitũ nĩ harĩ maciaro mothe marĩa mega mũno, marĩa merũ na marĩa ma tene, marĩa ngũigĩire, wee mwendwa wakwa. ^a