Cifuno Cace Ciri Kuna Ine

Mamuna asamsimba kutomera ku myendo yace yakubvala nsapato mpaka ku bvudzi lace, mbakomerwa naye pakweru. Nkazi nkhabe kupikhonda. Asapangiza kuti kufuna kunoko ndi kwa onsene awiri na ndi kwace, buluka asampita ku minda ya mphesa na ku miraga, kweneko adamuikhira miti yakubala.

Kapitulu 7.

Miyendo yako ndi yakubalika tani m'masandalya, iwe mwana wa mambo! Mapindi a maetu ako ali ninga miyala ya ntengo ukulu, basa ya manja a nyaluso wankulu. Mkombo wako ndi ngozwa yakuzungulira inakhonda kusoweka vinyu yakusanganiswa. Mimba yako ndi mulu wa tirigu wakuzungulirwa na maluwa. Mabele ako mawiri ali ninga ana mawiri a ngazela, mapasa a ngazela. Nsingo wako uli ninga nsanza ya meno a ndzou. Maso ako ndi madziva a ku Hexibhoni, pa nsuwo wa Bhati-rabhimi. Mphuno yako ili ninga nsanza ya Libhanu, inayang'anira ku Dhamasku. Nsolo wako uli padzulu pako ninga phiri ya Karmelo, pontho tsisi zako zakukhuluka ziri ninga nsalu za pepu; mambo wamangwa m'kati mwa tsisi zenezi. Wakubalika kakamwe, pontho wakukomesa kakamwe, ndiwe, wakufunika wanga, na pyonsene pyako pyakukomesa! Kuima kwako kuli ninga muti wa ntedwe, na mabele ako ninga masapu ace. Ine ndalonga kuti: “Ndinakwira muti wa ntedwe, mbandiphata misapo yace.” Mbele ako mbakhale ninga masumbu a mphesa, na cizwizwi ca kupuma kwako ninga maapulo, na mulomo wako ninga vinyu yadidi kakamwe. Isakhuluka mwadeku kuna wakufunika wanga, mbikhuluka pang'ono padzulu pa milomo na meno.

Ine ndine wa wakufunika wanga, pontho cifuno cace ciri kuna ine. Bwera, wakufunika wanga, tiendeni kunja ku minda, mbatigone usiku kumidzi. Tiende namacibese ku minda ya mphesa, toera kuona khala miti ya mphesa yameza mphundzi, khala maluwa afunguka, pontho khala miti ya roma yathumbuluka maluwa. Penepo ndinakupasa kufuna kwanga. Mitengo ya mandragora isabulusa cizwizwi cace, pontho padzulu pa misuwo yathu pana misapo yonsene yadidi kakamwe, yapsa na yakale, idandikukoyera iwe, wakufunika wanga. ^a