Chishuwo Chake Chiri Kwandiri

Murume anomurumbidza kubva patsoka dzake dzine shangu kusvika kubvudzi rake, achifara naye pachena. Iye haazvirambi. Anoti chido ichi ndechavo vose uye ndechake, ozomutungamirira kuminda yemizambiringa nokumisha, kwaakamuchengetera michero.

Chitsauko 7.

Dzakanaka sei tsoka dzako dziri mushangu, mwanasikana akakudzwa! Kupotoka kwezvidya zvako kwakaita samatombo anokosha, basa ramaoko emhizha. Rukuvhute rwako ndiro rakatenderera risingashayi waini yakavhenganiswa. Dumbu rako murwi wegorosi wakakombwa namaruva emahapa. Mazamu ako maviri akaita setwana tuviri, mapatya emhara. Mutsipa wako wakaita seshongwe yenyanga dzenzou. Meso ako madziva muHeshbhoni, pedyo nesuo reBhati-rabhimi. Mhino yako yakaita seshongwe yeRebhanoni, yakatarira kuDhamasiko. Musoro wako unokushongedza seKarimeri, uye bvudzi rako rakareba rakaita sepepuru; mambo akasungwa nemhotsi dzaro. Wakanaka sei uye unofadza sei, mudiwa, nokunakidza kwako kwose! Chimiro chako chakaita somuchindwe, uye mazamu ako akaita samasumbu awo. Ndakati, “Ndichakwira muchindwe ndibate michero yawo.” Mazamu ako ngaaite samasumbu emuzambiringa, uye kunhuhwirira kwemweya wako kuite semaapuro, uye muromo wako sewaini yakanakisisa. Inoyerera zvakanaka kumudiwa wangu, ichitsvedzerera zvinyoronyoro pamiromo nepamazino.

Ndiri womudiwa wangu, uye chishuwo chake chiri kwandiri. Uya, mudiwa wangu, ngatibude tiende kuminda tindorara mumisha. Ngatifumire kuminda yemizambiringa tione kana mizambiringa yabukira, kana maruva azaruka uye kana mitamba yotumbuka. Ipapo ndichakupa rudo rwangu. Mandareki anobudisa kunhuhwirira kwawo, uye pamusoro pemikova yedu pane michero yakanakisisa yose, mitsva nemisharu, yandakakuchengetera, mudiwa wangu. ^a