Hawwiin Isaa Gara Kootti
Namichi miila ishee kophee kophaa'e irraa hanga rifeensa isheetti ishee galateeffata, ishee irratti gammachuu isaa ifatti agarsiisa. Isheen of hin kaarooftu. Fedhii sana kan wal-fedhii fi kan ishee ta'ee ofitti fudhatti, achiis isa gara iddoo wayinii fi gandoota geessiti, achitti firii isaaf kuusattee jirti.
7 1Yaa intala ulfinaa, miilli kee kophee keessatti akkam bareedaa dha! Marsaan cinaachaa kee dhagaa gatii guddaa fakkaata, hojii harka ogeessa beekaa ti. 2Mudhiin kee xoqqoo marfamaa isa daadhii wayinii makame hin hanqanne dha. Garaan kee tuullaa qamadii daraaraadhaan marfame dha. 3Harmi kee lamaan jiboota lama, ijoollee lakkuu gafarsaa fakkaata. 4Mormi kee gamoo ilkaan arbaa fakkaata. Ijji kee Heshboon keessatti haroo, balbala Baat-rabbiim biratti argamu dha. Funyaanni kee gamoo Libaanoon, gara Damaasqoo ilaalu fakkaata. 5Mataan kee akka Qarmeloon si gonfoo, rifeensi kee dhangala'u immoo akka dhiilaa dha; mootiin tuta rifeensa isaa keessatti booji'ame. 6Yaa jaalalaa, ati gammachuu kee hundumaan akkam bareedaa fi akkam mi'aawaa dha! 7Dheerinni kee muka timiraa fakkaata, harmi kees abaaboo isaa fakkaata. 8Ani akkana jedhe, «Muka timiraa kana irratti nan ba'a, ija isaas nan qaba.» Harmi kee akka abaaboo wayinii, urgaan hafuura kees akka tufaahaa haa ta'u, 9afaan kees akka wayinii isa caalu haa ta'u. Inni jaallatamaa kootiif salphaatti in dhangala'a, hidhii fi ilkaan irra tasgabbiidhaan yaa'a.
10Ani kan jaallatamaa kooti, hawwiin isaas gara kootti. 11Kottu, jaallatamaa koo, gara lafa qonnaatti haa ba'u, gandoota keessattis halkan haa bulu. 12Barii gara iddoowwan wayinii haa deemnu, wayiniin ruufate moo hin ruufanne, daraaraan bante moo hin banne, rummaanonnis daraare moo hin daraarre haa ilaallu. Achitti jaalala koo siifin kenna. 13Daadaayiimiin urgaa isaanii in baasu, balbala keenya irrattis ija filatamaa hundi, kan haaraa fi kan durii, jaallatamaa koo, siif kan kuufadhe jira. a a v13 Daadaayiimiin biqiltoota urgaa gaarii turan; bara durii keessa hawwii jaalalaa kakaasuu fi dhaloota baay'isuuf gargaaru jedhanii baay'ee amanamu turan.
