Siak ti Tarigagayna
Ipadayaw ti lalaki ti babai manipud kadagiti sakana a addaan sandalias agingga iti buokna, ket nalawag ti ragsakna kenkuana. Saan nga ilimed ti babai dayta. Ibagana nga agsisinnuyon ken kukuana ti tarigagay, kalpasanna iturongna isuna kadagiti kaubasan ken ili, a sadiay naipempenna kenkuana dagiti bunga.
7 1Anian a nagpintas dagiti sakam iti sandalias, nadayaw nga anak a babai! Dagiti kurba ti luppomo ket kas kadagiti alahas, aramid dagiti ima ti nalaing nga artesano. 2Ti pusegmo ket maysa a nabilog a mangkok a di pulos agkurang iti nalaok nga arak. Ti tiyanmo ket bunton ti trigo a nalikmutan kadagiti lirio. 3Dagiti dua a barukongmo ket kas kadagiti dua nga urbon a lugan, kambal ti maysa a gasela. 4Ti tengngedmo ket kas iti torre a garing. Dagiti matam ket dagiti linaw idiay Hesbon, iti ruangan ti Bat-rabbim. Ti agongmo ket kas iti torre ti Libano, a nakasango iti Damasco. 5Ti ulom ket mangkorona kenka a kas iti Carmelo, ket ti naglaylay a buokmo ket kas iti purpura; naibaludan ti ari kadagiti trensana. 6Anian a nagpintas ken anian a makaay-ayo ka, O ayat, agraman dagiti amin a ragsakmo! 7Ti katayegmo ket kas iti kayo a palma, ket dagiti barukongmo ket kas kadagiti bunton ti bungana. 8Kinunak, “Sumang-atak iti kayo a palma ket tiliwek dagiti bungana.” Kas koma kadagiti bunton ti ubas dagiti barukongmo, ken ti anglit ti angesmo kas kadagiti mansanas, 9ken ti ngiwatmo kas iti kasayaatan nga arak. Agayus a nalamuyot para iti ay-ayatek, a sumursurot a nalamuyot kadagiti bibig ken ngipen.
10Kukuanak ni ay-ayatek, ket siak ti tarigagayna. 11Umaykan, ay-ayatek, rumuaratayo idiay talon ket agpatnagtayo kadagiti purok. 12Bigbigat a mapatayo kadagiti ubasan ket kitaentayo no immuto dagiti ubas, no nagukradan dagiti sabong ket sumabsabong dagiti granada. Sadiay itedkonto kenka ti ayatko. 13Agsaknap ti anglit dagiti mandrake, ket iti ngato dagiti ruangantayo adda dagiti amin a kasasayaatan a bunga, baro ken daan, nga indulinko para kenka, ay-ayatek. a a v13 Dagiti mandrake ket nabanglo a mulmula a patpatien iti kadaanan a lubong a mangpaggunay iti tarigagay ti ayat ken mangpaadu iti panagbunga.
