Haoei ngo to mangsühda
Laoei sao you namsek setbü ka kaoshang sühko sao nyen sangkei, yongko sao shanga olinko. Saoei kho asepeida. Saoei sanou kho penyibü hoba sao lolobü dogo lauda, kheijinei haoei hao to ponlem hoba sangnyu to leian loukei, kho sangnyua saoei hao shanga lilibü thankei.
7 1Kaibü you ngok yukbü lai saomaibü, jaishou nouyangnyu! Kaibü youshi tongtongbü namseklaang tegü ki, songsihon kibü müteibü ikei kümbü lele ki. 2Kaibü naophung tongtongbü shem tegü ki, khünei ih saübü ponpen kida. Kaibü shimung whet youshou laangshang tegü ki, lilibüei kaijembo aüetbü lele ki. 3Kaibü sen penyi meishi shoushou penyi tegü ki, saakeibü phokbü shou ki. 4Kaibü ngüm thunyu hauh laangchem tegü ki. Kaibü nyek Heshbona kibü thimdei, Bathrabbim koukhün danko kibü tegü ki. Kaibü kung Lebanon laangchem tegü ki, Damaska aeto chühko ki. 5Kaibü khu Karmel shongh tegü kaibü thüka ki, hoba kaibü khulou nakthüngbü tegü ki; khulou shuonga Choba thüngan kikei. 6Lai saomaibü hoba lai maangamaibü no ki, sanoubü, kaibü maang haibü pendou yoa! 7Kaibü süngsilop pünglong tegü ki, hoba kaibü sen khübü shen shuong tegü ki. 8Ngei laukei, “Ngo pünglong to anglabü hoba khübü hek laplabü.” Kaibü sen semlüh shen tegü kitishi, hoba kaibü hak ponlem buhek maibü tegü kitishi, 9hoba kaibü sembung ih maiboutham tegü ki. Kho ngeibü sanoubü shanga hangsho kouda, sembungkhop hoba hauh thüka hangsho kouda.
10Ngo ngeibü sanoubü-eibü ki, hoba haoei ngo to mangsühda. 11Kaiya, ngeibü sanoubü, sen sek to kouan sang yoan ka otkho. 12Sen ngeyang enyu semlühlaak to haukho, hoba semlüh nyem longkeilao, chipen pungkeilao, hoba chilang pungkeilao chühkho. Khünei ngei ngeibü sanou ka la kulabü. 13Moliqheei khübü ponlem kuda, hoba seneibü koukhün thüka buhek maiboutham pendou, haanbü hoba hangbü, kikei, laobou ngei ka shanga thanan phoakei, ngeibü sanoubü. a a v13 Moliqhe kho ponlem kibü bulong che kikei, laobou shangiednyu kaodak ka müt pendouei sanou mangsüh pokuda hoba bukyohaa pokuda dogo mailemkei.
