Ngo Kü Sanoubüeibü Ki
Jerusalembü nouyangnyu shuongei sao yoa lam leanla shanga hauteila lenkei, hoba saoei hao lato haubü ngelep dogo jongaikei. Laoei sao nyen sangkei: Choba yaksi saosem hoba yaksa maubü aying, lausikei sao kho che ong ki. Kheijinei nyetbü shuongei Shulammite to sepeian louashi dogo joyokei, sao nyetla shanga.
6 1Kaibü sanoubü laeto haukei, O yaksa shuong yoa saomaibütham? Kaibü sanoubü ai lamto haukei, künei ka yoa hao lamla shanga?
2Kü sanoubü hao bamang to yankei, ponlemhibü jen shen to, bamang yoa lamshaula shanga hoba lilibü heshaila shanga.
3Ngo kü sanoubüeibü ki, hoba kü sanoubü ngeibü ki; haoei lilibü yoa lamshauda.
4No Tirza tegü saomaibü ki, kü sanoubü, Jerusalem tegü maikei, nisan thüngbü sepai tan tegü hatlamoklabü. a a v4 Tirza kho shangabü Chobaeibü sangnyu che, haoeibü saomaibü shanga nyen sangbü che kikei, hanei Jerusalem yoa liko sangnyu shuong yoa aeibou saomaibü tegü phokubü.
5Kaibü nyek ngo ka sepeitiashi, aishanga haoenei ngo nyettida. Kaibü khu kho Gilead ka yanbü lon sanshuong tegü ki. 6Kaibü hauh kho sakla ka longbü sanlon pi sanshuong tegü ki, pendouei phokbü shou shatbü, hoba haoen yoka che ongkei jembü shoushou maubü aying. 7Kaibü kaoshang kho kaibü thangbü nei napheinei chilang hek ban nyi tegü ki.
8Choba yaksi saosem hoba thangnyu saolei kia, hoba khangenbou amu yaksa nashou juong kia, 9Lausikei kü dukutuk, kü penbüsoubü kho che ong ki, sao nyu la nouyangnyu che ong, sao bukkubü nyueibü maangshikbü ki. Yaksa nashou shuongei sao hapan sao to olinbou dogo laukei; Choba yaksi hoba thangnyu shuongeikei sao nyen sangkei.
10Lange tegü shingan longbü hibü ao ki, litnyu tegü saomaibü, chanyu tegü shingbü, nisan thüngbü sepai tan tegü hatlamoklabü?
11Ngo bu bamang to yankei, pholi chipen chühla shanga, semlüh nyem longkei si ange, hoba chilang chipen pungkei si ange ngela shanga.
12Ngei angelepto, kü mangsühbüei ngo kü maibü mütli kailong yoa phokubei.
13Sepeiashi, sepeiashi, O Shulambü; sepeiashi, sepeiashi, künei ka to chühla shanga. Kanei aila Shulambü to chühda, shaishang nyi tombolak lai chühbü tegü? b b v13 ‘Shaishang nyi tombolak’ dogo laubü khoei, chühbü shuong lin nyi thedang lean kanglanga kümbü maibü tombolak che damanda.
