Ni Ta Ƙaunataccena Ce

'Yan matan Urushalima sun yi tayin taimaka mata ta neme shi, ta amsa cewa ta san inda ya tafi. Mutumin yana yabonta: sarauniya sittin da mata marasa iyaka, duk da haka ita kaɗai ce. Sa'an nan masu kallo suna kiran Bashulamiya ta dawo don su dube ta.

Babi na 6.

Ina ƙaunataccenki ya tafi, ke mafi kyau cikin mata? Ta wace hanya ƙaunataccenki ya bi, domin mu neme shi tare da ke?

Ƙaunataccena ya gangara zuwa lambunsa, zuwa gadajen kayan ƙamshi, domin yă yi kiwo cikin lambuna yă kuma tattara furannin lili.

Ni ta ƙaunataccena ce, ƙaunataccena kuma nawa ne; yana kiwo cikin furannin lili.

Kina da kyau, ƙaunatacciyata, kamar Tirza, kyakkyawa kamar Urushalima, mai ban al'ajabi kamar runduna mai tutoci. ^a

Ki kau da idanunki daga gare ni, gama sun rinjaye ni. Gashin kanki yana kama da garken awaki da suke gangarowa daga Gileyad. Haƙoranki suna kama da garken tumaki mata da suka fito daga wankan, dukansu suna haifan tagwaye, babu ko ɗaya a cikinsu da ya rasa ɗansa. Kuncinki suna kama da sassan rumman a bayan lulluɓinki.

Akwai sarauniyoyi sittin da ƙwarƙwarai tamanin, da 'yan mata marasa iyaka, amma kurciyata, kamalalliyata, ita kaɗai ce, 'yar mahaifiyarta tilo, ƙaunatacciya ga wadda ta haife ta. 'Yan mata suka gan ta suka ce da ita mai albarka; sarauniyoyi da ƙwarƙwarai suma suka yabe ta.

Wace ce wannan da take haskakawa kamar alfijir, kyakkyawa kamar wata, mai haske kamar rana, mai ban al'ajabi kamar runduna mai tutoci?

Na gangara zuwa gonar goro domin in dubi furannin kwari, domin in ga ko kuringar inabi ta tohu, ko rumman ya yi fure.

Kafin in sani, sha'awata ta sa ni cikin keken yaƙin mutanena masu daraja.

Ki komo, ki komo, ke Bashulammiya; ki komo, ki komo, domin mu kalle ki. Don me kuke kallon Bashulammiya, kamar yadda ake kallon rawar sansani biyu? ^b