Wimbo Ulio Bora 6

6 ¹Amekwenda wapi mpenzi wako, wewe uliye mzuri kuliko wanawake wote? Amegeukia wapi mpenzi wako, ili tumtafute pamoja nawe?

²Mpenzi wangu ameshuka kwenda bustanini mwake, kwenye matuta ya manukato, kulisha katika bustani na kuchuma yungiyungi.

³Mimi ni wa mpenzi wangu, na mpenzi wangu ni wangu; hulisha kundi lake katika yungiyungi.

⁴Wewe ni mzuri, mpenzi wangu, kama Tirsa, unapendeza kama Yerusalemu, watia hofu kama jeshi lenye bendera. ^a a v4 Tirsa ulikuwa mji wa kale wa kifalme uliosifika kwa uzuri wake, umeunganishwa hapa na Yerusalemu kama miji iliyo mizuri kuliko yote.

⁵Geuza macho yako mbali nami, kwa maana yananishinda. Nywele zako ni kama kundi la mbuzi wanaoteremka kutoka Gileadi. ⁶Meno yako ni kama kundi la kondoo waliopanda kutoka kuoshwa, wote wakizaa mapacha, wala hakuna hata mmoja kati yao aliyefiwa na mtoto wake. ⁷Mashavu yako ni kama vipande viwili vya komamanga nyuma ya utaji wako.

⁸Kuna malkia sitini na masuria themanini, na wasichana wasiohesabika, ⁹lakini hua wangu, mkamilifu wangu, ndiye pekee, binti pekee wa mama yake, kipenzi cha yeye aliyemzaa. Wasichana walimwona, wakamwita heri; malkia na masuria wakamsifu pia.

¹⁰Ni nani huyu anayeng'aa kama mapambazuko, mzuri kama mwezi, mng'avu kama jua, watia hofu kama jeshi lenye bendera?

¹¹Nilishuka kwenye bustani ya mikangara ili kuangalia machipuko ya bondeni, kuona kama mzabibu umechipua, kama mikomamanga imetoa maua.

¹²Kabla sijatambua, tamaa yangu ilinikalisha kati ya magari ya vita ya watu wangu wenye heshima.

¹³Rudi, rudi, ewe Mshulami; rudi, rudi, ili tukutazame. Kwa nini mnamtazama Mshulami, kama kwenye ngoma ya kambi mbili? ^b b v13 'Ngoma ya kambi mbili' inaonyesha maandamano ya madaha yanayochezwa kati ya safu mbili za watazamaji zinazoelekeana.