I iwui Leikashewuina
Jerusalemwui naongalāva̱bingna ali phākhavai ngasokhavai hānga, kala ana chili ngahānkai, ana kachishong vākhala ina thei. Mayarnao china ali ngathem kasoa: awungva̱ hangtharuk kala mashankharar sha̱nao lei, kha ava akhamāngna. Chiwui thili khayangbingna Shulamnao chili ali yangkhavai latunglu da hoi.
6 1Nawui leikashe kali vāhaokhala, O ngalānaobingwui ngachaili mathāmeikap kachiva̱? Ithumna nali ngasoda ali phākhavai, nawui leikashe apong khipāli vāhaokhala?
2Iwui leikashe yāmgui ngachaili phāshai khavai kala timrāwon kazipkhui khavai, awui yāmguili, nganamkaphā thao lingkhavaipamli tunghaira.
3I iwui leikashewuina, kala iwui leikashe iwuina; ana timrāwon ngachaili phāshai ngasaka.
4Iwui leikashiva̱, nava Tirzah thāda mathāli, Jerusalem thāda yangngaili, philān leilaga raimibing thāda khangachee khangachāna. a a v4 Tirzah hi achālakhawui wungnaowui keinung akhana, awui khamathāwui vang mikhamayānga; hili keinung saikorawui ngachaili mathāmeikap kaje thāda Jerusalem eina ngasoda peihai.
5Namik iwui eina pākhaimilu, kaja anina ili ngaphaoror ngasaka. Nakuisam Gilead eina me ashangva̱ kazat thai. 6Nahāna pheokhui eina ra̱vailaga kashok yao ava̱ ashangva̱ thai, athum kachiva̱ ngashirkatā pharākahaia, kala athumwui ngachaili akha eina tangda anao shimān kahai maleimana. 7Nawui mairār alungli namaisor chi kabothei ngakaipak kahai imānga.
8Awungva̱ hangtharuk kala angashirva̱ hangchishat lei, kala ngalānaobing mashānrarmana, 9Kha iwui nāsha̱nao, iwui kākashungva̱ akhamānga, ava̱va̱wui naongalāva̱ akhamānga, ali kapharāva̱wui khalumava̱na. Ngalānaobingna ali theilaga soranu da hānga; awungva̱bing kala angashirva̱bingna tākam eina ali masochikata.
10Kazing kathang thāda horshoka, kachāng thāda mathāli, zimik thāda hora, philān leilaga raimibing thāda khangachee khangachāna hi khipākhala?
11Tampākwui awon yangkhavai, drakhārong ashon shonhairakhala, kabothei awon wonhairakhala ayangkhavai, ina Nut yāmguili tunga.
12Ina matheila tangda, iwui malungkachāng ili iwui khayākakā mibingwui siguigari ngachaili haihaira.
13Latunglu, latunglu, O Shulammite; latunglu, latunglu, ithumna nali yangsi kaje. Rāmrah khaniwui pheichak yang thāda, khisāda nathumna Shulammiteli yangkhala? b b v13 'Rāmrah khaniwui pheichak' hi yangkabing mai ngareingasungda nganinga ngashekkatā khaniwui ngachaili sākahai khamathā pheichak akhali pantama.
