መሃልየ 6 FHB Father's Heart Bible™

6 ¹ፍቑርኪ ናበይ ከደ፥ ኣቲ ካብ ኵለን ኣንስቲ ዝበለፅኪ መልክዐኛ? ምሳኺ ኽንደልዮ፥ ፍቑርኪ ናበይ ገፅ ኣቢሉ ኸደ?

²ፍቑረይ ናብ ገነቱ ወረደ፥ ናብ ኣታኽልቲ ቀመማት፥ ኣብ ማእኸል ገነታት ክጓሲ፥ ዕምበባ ሱፍ ድማ ክእክብ።

³ኣነ ናይ ፍቑረይ እየ፥ ፍቑረይ ድማ ናተይ እዩ፤ ንሱ ኣብ ማእኸል ዕምበባ ሱፍ ይጓሲ።

⁴ኣቲ ፍቕርተይ፥ ከም ቴርሳ መልክዐኛ ኢኺ፥ ከም ኢየሩሳሌም ፅብቕቲ፥ ሰንደቕ ዕላማ ከም ዘለዎ ሰራዊት ዝፍራሕ ኢኺ። ^a a v4 ቴርሳ ብመልክዓ ዝተመስገነት ጥንታዊት ናይ ንጉስ ከተማ ነበረት፤ ኣብዙይ ድማ ከም ኣዝየን ዝፀበቓ ከተማታት ምስ ኢየሩሳሌም ተዛሚዳ ኣላ።

⁵ኣዒንትኺ ካባይ መልሲ፥ ይስዕራኒ ኣለዋ እሞ። ፀጕርኺ ካብ ገለዓድ ዝወርድ መጓሰ ኣጣል ይመስል። ⁶ኣስናንኪ ካብ ምሕፃብ ዝደየባ መጓሰ ኣንስትዮ ኣባጊዕ ይመስላ፥ ኵለን ማንታ ዝወለዳ፥ ካብኣተን ሓንቲ እኳ ዝጓደለት የላን። ⁷ምንጋጋኺ ብድሕሪ መጋረጃኺ ከም ፍንፃል ሮማን እዩ።

⁸ስሳ ንግስታትን ሰማንያ ኣንስቲ ወሰንን ኣለዋ፥ ዘይቝፀራ ኣጓላት ድማ ኣለዋ፥ ⁹ርግበይ ግና፥ ፍፅምተይ፥ እታ ሓንቲ ጥራሕ እያ፤ ናይ ኣዲኣ እንኮ ጓል፥ ነታ ዝወለደታ ተፈታዊት እያ። ኣጓላት ረአያኣ፥ ብፅእቲ ድማ በላኣ፤ ንግስታትን ኣንስቲ ወሰንውን ኣድነቓኣ።

¹⁰ከም ወጋሕታ እትበርቕ እዚኣ መን እያ፥ ከም ወርሒ መልክዐኛ፥ ከም ፀሓይ ብርህቲ፥ ሰንደቕ ዕላማ ከም ዘለዎ ሰራዊት እትፍራሕ?

¹¹ዕምበባ እቲ ለሰ ኽርኢ፥ ናብ ገነት ለውዚ ወረድኩ፥ ወይኒ ዓምቢባ እንተ ኾይና፥ ሮማን ዓምቢቡ እንተ ኾይኑ ኽርኢ።

¹²ከይፈለጥኩ ኸለኹ፥ ድሌተይ ኣብ ማእኸል ሰረገላታት ክቡር ህዝበይ ኣቐመጠኒ።

¹³ተመለሲ፥ ተመለሲ፥ ኣቲ ሱላማዊት፤ ክንጥምተኪ፥ ተመለሲ፥ ተመለሲ። ነታ ሱላማዊት ስለ ምንታይ ትጥምትዋ፥ ከም ጐይላ ክልተ ሰፈር? ^b b v13 እቲ “ጐይላ ክልተ ሰፈር” ዝበሃል፥ ኣብ መንጎ ክልተ ገፅ ንገፅ ዝተሰለፉ ተዓዘብቲ ዝግበር ምልኩዕ ሰልፊ የመልክት።