ማሕልየ መሓልይ 6

6 ¹ከሴቶች ሁሉ ይበልጥ ውብ የሆንሽ ሆይ፣ ውድሽ ወዴት ሄደ? ከአንቺ ጋራ እንድንፈልገው ውድሽ በየትኛው መንገድ ሄደ?

²ውዴ ወደ አትክልቱ ስፍራ፣ ወደ ሽቱ ዕፅዋት መደብ ወርዷል፤ በአትክልት ስፍራዎች መካከል ሊሰማራ፣ ሱፍ አበቦችንም ሊለቅም ሄዷል።

³እኔ የውዴ ነኝ፤ ውዴም የእኔ ነው፤ እርሱ በሱፍ አበቦች መካከል ይሰማራል።

⁴ውዳጄ ሆይ፣ እንደ ቲርሳ ውብ ነሽ፤ እንደ ኢየሩሳሌም ተወዳጅ ነሽ፤ ሰንደቅ ዓላማ እንደ ያዘ ሰራዊት የምታስፈሪ ነሽ። ^a a v4 ቲርሳ በውበትዋ የተመሰገነች ጥንታዊት የንጉሥ ከተማ ነበረች፤ እዚህም ከከተሞች ሁሉ እጅግ ተወዳጅ እንደ ሆነች ከኢየሩሳሌም ጋራ ተጣምራለች።

⁵ዐይኖችሽን ከእኔ መልሺ፤ ያሸንፉኛልና። ጠጕርሽ ከገለዓድ ተራራ እንደ ወረደ የፍየሎች መንጋ ነው። ⁶ጥርሶችሽ ከመታጠቢያ እንደ ወጡ የበጎች መንጋ ናቸው፤ ሁሉም መንታ የወለዱ ናቸው፤ ከእነርሱም መካከል ልጁን ያጣ አንድም የለም። ⁷ጕንጮችሽ ከመሸፈኛሽ በስተ ኋላ እንደ ተሰነጠቀ የሮማን ፍሬ ናቸው።

⁸ስድሳ ንግሥታትና ሰማንያ ቁባቶች አሉ፤ ቍጥር የሌላቸው ወጣት ሴቶችም አሉ፤ ⁹ርግቤ፣ ፍጽምቴ ግን ብቸኛዪቱ ናት፤ የእናትዋ አንዲት ልጅ፣ ለወለደቻት ተወዳጅ ናት። ወጣት ሴቶች አይተዋት ብፅዕት አሏት፤ ንግሥታትና ቁባቶችም አመሰገኗት።

¹⁰ይህች እንደ ጎህ የምትወጣ፣ እንደ ጨረቃ ውብ የሆነች፣ እንደ ፀሐይ የምታበራ፣ ሰንደቅ ዓላማ እንደ ያዘ ሰራዊት የምታስፈራ ማን ናት?

¹¹የሸለቆውን አበቦች ለማየት፣ ወይኑ ማቈጥቈጡንና ሮማኑም ማበቡን ለማየት ወደ ለውዝ አትክልት ወረድሁ።

¹²ሳላውቀው ምኞቴ በተከበረው ሕዝቤ ሰረገላዎች መካከል አኖረኝ።

¹³ተመለሺ፣ ተመለሺ፣ ሱላማዊት ሆይ፤ እንድንመለከትሽ ተመለሺ፣ ተመለሺ። ሱላማዊትን እንደ ሁለቱ ሰፈሮች ጭፈራ ለምን ትመለከታላችሁ? ^b b v13 ‹የሁለቱ ሰፈሮች ጭፈራ› የተባለው በሁለት ትይዩ ተመልካቾች ረድፎች መካከል የሚከናወን ውብ ሰልፍን ያሳያል።