உன்னதப்பாட்டு 6

6 ¹உன் நேசர் எங்கே போனார், பெண்களில் அதிக ரூபவதியே? உன்னோடு அவரைத் தேடும்படி, உன் நேசர் எவ்வழியாய்ச் சென்றார்?

²என் நேசர் தம்முடைய தோட்டத்திற்கு இறங்கிப்போனார், நறுமணப் பாத்திகளுக்கே சென்றார், தோட்டங்களில் மேய்ந்து, லீலிபுஷ்பங்களைச் சேகரிக்கவே சென்றார்.

³நான் என் நேசருடையவள், என் நேசர் என்னுடையவர்; அவர் லீலிபுஷ்பங்களுக்குள்ளே மேய்கிறார்.

⁴என் பிரியமே, நீ திர்சாவைப்போல் ரூபவதி, எருசலேமைப்போல் அழகுள்ளவள், கொடியேந்திய சேனையைப்போல் பயங்கரமானவள். ^a a v4 திர்சா என்பது தன் அழகுக்குப் பேர்பெற்ற பூர்வகால ராஜதானி நகரம்; நகரங்களிலெல்லாம் அழகுள்ளதாய் இங்கே எருசலேமோடு இணைத்துச் சொல்லப்படுகிறது.

⁵உன் கண்களை என்னைவிட்டுத் திருப்பிக்கொள், அவைகள் என்னை மேற்கொள்ளுகிறதே. உன் கூந்தல் வெள்ளாட்டு மந்தையைப்போல், கீலேயாத் மலையிலிருந்து இறங்கிவருகிறது. ⁶உன் பற்கள் குளிப்பாட்டப்பட்டு ஏறிவரும் ஆட்டு மந்தையைப்போல் இருக்கிறது; அவைகள் எல்லாம் இரட்டைக் குட்டியீன்றவைகள், அவைகளில் ஒன்றும் மலடாயிராது. ⁷உன் முக்காட்டின் மறைவில் உன் கன்னங்கள் மாதுளம்பழத்தின் பாதிகளைப்போல் இருக்கிறது.

⁸அறுபது ராஜஸ்திரீகளும், எண்பது மறுமனையாட்டிகளும், எண்ணிக்கையில்லாத கன்னிகைகளும் இருக்கிறார்கள்; ⁹ஆனாலும் என் புறாவும் என் உத்தமியுமானவள் ஒருத்தியே; அவள் தன் தாய்க்கு ஒரே மகள், தன்னைப் பெற்றவளுக்குப் பிரியமானவள். கன்னிகைகள் அவளைக் கண்டு அவளைப் பாக்கியவதி என்றார்கள்; ராஜஸ்திரீகளும் மறுமனையாட்டிகளும் அவளைப் புகழ்ந்தார்கள்.

¹⁰விடியற்காலத்தைப்போல் உதயமாகி, சந்திரனைப்போல் அழகுள்ளவளாய், சூரியனைப்போல் பிரகாசமுள்ளவளாய், கொடியேந்திய சேனையைப்போல் பயங்கரமுள்ளவளாய் இருக்கிற இவள் யார்?

¹¹பள்ளத்தாக்கின் புஷ்பங்களைப் பார்க்க, நான் வாதுமைத் தோட்டத்திற்கு இறங்கிப்போனேன், திராட்சச்செடி துளிர்விட்டதோ, மாதுளஞ்செடிகள் பூத்ததோ என்று பார்க்கவே சென்றேன்.

¹²நான் அறியுமுன்னே, என் ஆவல் என்னை என் மேன்மையான ஜனத்தின் இரதங்களுக்குள்ளே வைத்தது.

¹³திரும்பு, திரும்பு, சூலமித்தியே; திரும்பு, திரும்பு, நாங்கள் உன்னை நோக்கிப் பார்க்கும்படி திரும்பு. நீங்கள் சூலமித்தியை நோக்கிப் பார்க்கிறதென்ன, இரண்டு பாளையங்களின் நடனத்தைப் பார்ப்பதுபோலவா? ^b b v13 'இரண்டு பாளையங்களின் நடனம்' என்பது எதிரெதிராய் நிற்கும் இரண்டு வரிசைப் பார்வையாளர்களுக்கு நடுவே நிகழ்த்தப்படும் அழகிய ஊர்வலநடனத்தைச் சித்தரிக்கிறது.