Abụ m nke onye m hụrụ nʼanya

Ụmụ ada Jerusalem kwere inyere ya aka ịchọ ya, ọ zakwara na ya maara ebe ọ gara. Nwoke ahụ na-eto ya: ndị eze nwaanyị iri isii na ụmụ nwaanyị a na-apụghị ịgụ ọnụ, ma ọ bụ naanị ya bụ otu ahụ. Mgbe ahụ ndị na-ele anya kpọrọ nwaanyị Shulam ka ọ laghachi ka ha lee ya.

Isi 6.

Ebee ka onye ị hụrụ nʼanya gara, gị onye kacha mma nʼetiti ụmụ nwanyị? Olee ụzọ onye ị hụrụ nʼanya si gaa, ka anyị na gị chọọ ya?

Onye m hụrụ nʼanya agbadala gaa nʼubi ya, nʼebe a kụrụ ụda na-esi ísì ụtọ, ka ọ na-ata nri nʼetiti ubi ndị ahụ na iri okoko lili.

Abụ m nke onye m hụrụ nʼanya, onye m hụrụ nʼanya bụkwa nke m; ọ na-ata nri nʼetiti okoko lili.

Ị mara mma, onye m hụrụ nʼanya, dị ka Tịaza, ị maka mma dị ka Jerusalem, ị dị egwu dị ka ndị agha jidere ọkọlọtọ. ^a

Wepụ anya gị nʼebe m nọ, nʼihi na ha na-emeri m. Ntutu isi gị dị ka ìgwè ewu nke na-arịdata site na Gịliad. Eze gị dị ka ìgwè atụrụ nne nke si nʼebe a na-asa ahụ rịgopụta, ha niile na-amụpụta ejima, ọ dịghịkwa otu nʼime ha tụfuru nwa ya. Agba gị abụọ dị ka ọkara mkpụrụ pomegranet nʼazụ akwa mkpuchi ihu gị.

E nwere ndị eze nwanyị iri isii na ndị iko nwanyị iri asatọ, na ụmụ agbọghọ a na-apụghị ịgụta ọnụ, ma nduru m, onye m zuru oke, bụ naanị otu, naanị ada nne ya, onye kacha amasị onye mụrụ ya. Ụmụ agbọghọ hụrụ ya kpọọ ya onye a gọziri agọzi; ndị eze nwanyị na ndị iko nwanyị tokwara ya.

Onye bụ onye a nke na-enwupụta dị ka chi ọbụbọ, onye maka mma dị ka ọnwa, na-enwu dị ka anyanwụ, dị egwu dị ka ndị agha jidere ọkọlọtọ?

Agbadara m gaa nʼubi osisi mkpụrụ akị ịhụ okoko osisi nke ndagwurugwu, ịchọpụta ma osisi vaịn ọ wapụtala ome, ma pomegranet ọ chara okoko.

Tupu m matakwa, ọchịchọ m dọbara m nʼetiti ụgbọ agha nke ndị m a ma ama.

Lọghachi, lọghachi, gị onye Shulam; lọghachi, lọghachi, ka anyị legide gị anya. Gịnị mere unu ji elegide onye Shulam anya, dị ka a na-ele egwu nke ebe obibi abụọ? ^b