Anee ne po chamanennyu
Chamei tiibiigap Jerusalem kotoretei ineendet kocheeng', ak kowolji kole ngen ole kagoba ineendet. Lasei muren ineendet: osotik tamanwogik lo ak kwonyiik che ma kergei, ago ko ineendet kityo ne agenge. Yeityo kuurei piik koweeksei Shulamit si keger ineendet.
6 1Ole kagoba chamaneng'ung', inyee ne karaaran kosiir tiibiik tugul? Ooreet ne ainon kagoba chamaneng'ung', si kecheeng' kobooten inyee?
2Kagochorugei chamanennyu kwo mbareennyi, itogusyegap tuguuk che ng'uu ne anyiny, si koagete kwenutap mbareenik ak koyum taaptook.
3Anee ne po chamanennyu, ak chamanennyu ko nenyu; agetei kwenutap taaptook.
4Karaaran inyee, chamanennyu, ko uu Tirzah, korooron ko uu Jerusalem, kiywei ko uu lugeet ne tinyei songolik. a a v4 Ki Tirzah nganaseetap laitornatet ne po keny ne ki kilasu agobo korooronindonyi, ne kitokyingei yu ak Jerusalem ko uu nganasook che karaaran kosiir tugul.
5Weekta konyeguk kong'etee anee, amu terterech. Suumeeguk ko uu akweetap ng'oroorek che choorugei kobunu Gilead. 6Keleguk ko uu akweetap keechiirek che kagong'et kobunu uunet, che ipei sarameek tugul, ak ma mi age amonik ne kagobetwo lakweennyi. 7Tagilgiliguk ko uu roptap logoiyat eng' let angeeng'ung'.
8Mi osotik tamanwogik lo ak chebaigeinik tamanwogik sisiit, ak tiibiik che ma kergei, 9Ago cheptugennyu, nenyu ne ititaat, ko agenge kityo, cheptap kamennyi ne agenge, ne chamei ineendet ne ki kosich ineendet. Kigeer tiibiik ineendet ak koguure ne poiboen; ak kochoi osotik ak chebaigeinik ineendet kora.
10Ng'oo ni ne iluuyei ko uu karon, ne karaaran ko uu arawet, ne leel ko uu asiista, kiywei ko uu lugeet ne tinyei songolik?
11Kaachoor ng'wony mbareetap keetiigap logoek si keer taaptogap atebweet, si keer ngo kagong'at keetitap sabibuk, ngo kagoyesyo logoek.
12Kotomo anai, koinde mageetinnyu anee kwenutap kariisyegap piigap pounatennyu.
13Weeksei, weeksei, chepShulam; weeksei, weeksei, si keger inyee. Amune igeeri chepShulam, ko uu ureryetap meng'otosyek aeng'? b b v13 ‘Ureryetap meng'otosyek aeng'’ ko kaboorunetap wendetap urerindo ne karaaran ne kiyaei kwenutap kekwootosyek aeng' che tokyingei che po piik che geerei.