Ina Khāmong Shomi, kha Ana Vāhaira
Ana awui yāmguili rāhaira da hānga. Chiwui thili sha̱nao china ngayā akhali kashom kāli ning ngaraida mayāngda shomi, kha ana thuihaira kaji hāngshoka. Phākazatli khamayonabingna ali shaoda za̱mi. Ana khangateibingli khi mathākhamei lei da kahoa tharan, ana ali akui eina phei tangda hāngchitheia.
5 1Ina iwui yāmguili rāhaira, izarva̱, iwui khām kahaiva̱; iwui myrrh iwui nganamkaphā ngasoda kazipkhuihaira, iwui khuihāng iwui khuira̱ ngasoda shaihaira, iwui drakhāra̱ iwui seina̱ ngasoda manghaira. Zalu, ngasotnaobing; manglu, kala pemda manglu, leikashebing!
2Ina pihaira, kha iwuklung mapimana. Akhon akha shāhaowa; iwui leikashe khāmong shaopama: "Ili shomilu, izarva̱, iwui leikashiva̱, iwui nāsha̱nao, iwui kākashunga, kaja ikui ikra̱na ya̱sophaira, isam ngayāwui ikra̱na." 3Iwui phahon raimihaira; kathada ina chi ngavailuishitshapra? Iwui phei pheohaira; kathada chi thuikhanam sāshapra? 4Iwui leikashena awui pāng khāmong ngaveili heirora, kala ining iwui alungli ringphāhaowa. 5Iwui leikashewui vang khāmong shokhavai ina ngakarthuihaira, kala khāmong shungnamwui zungkhavaibingtungli ipāng myrrh na ngayishon, ipāngmareng myrrh ara̱na ngayishon. 6Iwui leikashewui vang khāmong ina shomihaira, kha iwui leikashe ngaranda vāhaira. Ana hānga chitharan imanglā zangshunghaowa. Ina ali phāhaira, kha ali masamphangmana; ina ali hoi, kha ana mangahānkāmana. 7Athum keinungli yaozatlakha, khamayonabingna ili samphanga; athumna ili shaowa, ili khamā zamihaowa; phākhowui khamayonabing china iwui kachon iwui eina ngapaithuihaowa. 8Ina nathumli kasoi, Jerusalemwui naongalāva̱bing, iwui leikasheli nathumna theiakha, ina leikashina kazāhaira da ali hānglu. 9Nawui leikashe khangatei leikashelila khi kālāngkhala, sha̱naobing ngachaili mathā kāmeiva̱? Nawui leikashe khangatei leikashelila khi kālāngkhala, chithada nana ithumli kasokhala?
10Iwui leikashe horngasaka kala hormeisai, mi thing tharā ngachaili ngamkhameiva̱. 11Awui akui sinā mathāmeikap kajena; awui sam kaphung, hangkhā thāda zika. 12Awui mik tara̱ khalongwui kongpheili khalei, seina̱li ra̱vaikahai, chāra̱-chāsān thāda apamli sāsang kahai nāsha̱nao thai. 13Awui maisor nganamkaphā yurwui pet thai, nganamkaphā thingnā hanwui dolan thai. Awui morchai timrāwon thai, myrrh ara̱na ngayishon. 14Awui pāngthei sinā khara̱bing thai, chāra̱-chāsān eina sāsangkahai. Awui phasā mafahā kashutkharik kahai thai, sapphire eina sāsangkahai. 15Awui phei sinā mathāmeikap kaji apheizingli sākāmi kahai alabaster pākra̱bing thai. Awui zakmai cedarthingbing thāda kasaka Lebanon thai. 16Awui khamor shima shim, kala a yikransanhai ngahānngailaka. Hi iwui leikashena, kala hi iwui ngasotnaona, Jerusalemwui naongalāva̱bing.
