Nali Achuk Maleimana
Mayarnao china sha̱nao chili akhor akhor eina ngathem kasoa, ali iwui khām kahaiva̱ kala izarva̱ da hoi, nawuili khavāt akhala maleimana da hānga. Ava yāmgui ngavei kahai, saphintit kahai ura̱, awui vang akhamānga. Akhameili sha̱nao china ngahānkai, masili hoda yāmgui chi amanā shomi.
4 1Na kayākha mathā, iwui leikashiva̱, na kayākha mathāli! Namai mairār alungli namik nāsha̱nao thai. Nakuisam me ashangva̱ thai, Gilead kaphungpheili kazat thai. 2Nahāna sam kadhara kachichā kahai yaova̱bing ra̱vailaga kashok thai, khanini ngathānkazata, kala athumwui alungli akhala anao makashuma. 3Namorchai kazaira̱ kahung thai, kala natuimatui mathāli. Namai mairār alungli, namaisor china kabothei ngakaipak kahai thai. 4Nakahung Davidwui dolan thai, lung ngaher eina sākahaina; chitungli chāngvei thing akha hokthānghai, kachiva̱ raikapingawui chāngveina. 5Nasungthei khanini chaonao khani thai, chao ngashirkatā, timrāwon ngachaili phāshaira. 6Kazing mayingranglakha, khaya̱ mayongthuiranglakha, ina myrrh kaphungli vāra kala frankincense kaphungli vāra. 7Na katonga mathāli, iwui leikashiva̱; nali achuk maleimana.
8Iwui ngasoda Lebanonwui eina rālu, iwui khām kahaiva̱; iwui ngasoda Lebanonwui eina rālu. Amanawui kaphungton eina, Senir eina Harmonwui kaphungton eina, kazingkha̱bingwui akhur eina, kuirāngbingwui kaphung pam eina yangtālu. 9Nana iwui malung yuihaira, izarva̱, iwui khām kahaiva̱; namik yang akha eina, nachāwui hirā akha eina iwui malung yuihaira. 10Nawui leikashi kayākha mathāli, izarva̱, iwui khām kahaiva̱! Nawui leikashi drakhāra̱li lāngda kayākha phameikhala, kala nawui thaowui anganam nganamkaphā otyur saikorali lāngda phāmei! 11Namorchaina khuihāng ngaya̱tai, iwui khām kahaiva̱; khuira̱ eina seina̱ namale azingli lei, kala nawui kashankachonwui anganam Lebanonwui anganam thai.
12Iwui izarva̱, iwui khām kahaiva̱ hi lonkazak kahai yāmguina, lonkazak kahai ra̱khongna, mahor namkahai ura̱na. 13Nawui aphāngbing kabothei yāmgui thai, athei mathāmeikapbing eina ngasoda, henna eina nard, 14nard eina saffron, calamus eina sākom, thing kachiva̱ eina ngasoda frankincense, myrrh eina aloe, nganamkaphā otyur mathāmeikap saikora eina ngasoda. a a v14 Calamus hi nganamkaphā sāda kasā, nganam shim khalei mathira̱ akhana. 15Na yāmguiwui ura̱na, kharing tara̱wui ra̱khongna, kala Lebanonwui eina longkatā kongrānaobingna. 16Atungshong masi, ngakarthuilu, kala azingshong masi, rālu! Chiwui nganamkaphā yur longkhavai, iwui yāmguili unglu. Iwui leikashe awui yāmguili rāranu kala chiwui athei mathāmeikap shairanu.
