Hapana Chakaipa Mauri
Murume anorumbidza mukadzi chimwe nechimwe chomuviri wake, omuti mwenga wake nehanzvadzi yake, oti hapana chakaipa maari. Iye munda wakakiyiwa, tsime rakasimbiswa, rake oga. Pakupedzisira iye anopindura, achidana mhepo uye achizarura munda iwoyo iye pachake.
4 1Wakanaka sei iwe, mudiwa wangu, wakanaka sei! Meso ako injiva seri kwechifukidzo chako. Bvudzi rako rakaita seboka rembudzi dzinoburuka pamateru eGiriyeadhi. 2Mazino ako akaita seboka rehwai dzichangogerwa mvere dzinokwira dzichibva pakushambidzwa, imwe neimwe ine mapatya, uye hapana kana imwe pakati padzo isina vana. 3Miromo yako yakaita sorushinda rutsvuku, uye muromo wako unoyevedza. Matama ako akaita sezvidimbu zviviri zvedamba seri kwechifukidzo chako. 4Mutsipa wako wakaita seshongwe yaDhavhidhi, yakavakwa nemitsara yamabwe; pairi pakaturikwa nhoo chiuru, imwe neimwe inhoo yemhare. 5Mazamu ako maviri akaita sevana vaviri vemhara, mapatya emhara, anofura pakati pamaruva. 6Kusvikira zuva rafema uye mimvuri yatiza, ndichaenda kugomo remura uye kuchikomo chorusenzi. 7Wakanaka chose, mudiwa wangu; hapana chakaipa mauri.
8Uya neni uchibva kuRebhanoni, mwenga wangu; uya neni uchibva kuRebhanoni. Tarira wakadzika uchibva pamusoro-soro peAmana, uchibva pamusoro peSeniri neHerimoni, uchibva pamapako eshumba, uchibva pamakomo anogarwa neingwe. 9Wabata mwoyo wangu, hanzvadzi yangu, mwenga wangu; wabata mwoyo wangu nokutarira kumwe kwameso ako, nedombo rimwe rechishongo chomutsipa wako. 10Rwakanaka sei rudo rwako, hanzvadzi yangu, mwenga wangu! Rudo rwako runopfuura sei waini, uye kunhuhwirira kwamafuta ako kunopfuura zvinonhuhwira zvose! 11Miromo yako inodonha uchi hunotapira, mwenga wangu; uchi nomukaka zviri pasi porurimi rwako, uye kunhuhwirira kwenguo dzako kwakaita sokunhuhwirira kweRebhanoni.
12Bindu rakakiyiwa ihanzvadzi yangu, mwenga wangu, chitubu chakakiyiwa, tsime rakanamwa. 13Mapazi ako ibindu rematamba ane michero yakaisvonaka, hena nenadhi, 14nadhi nesafuroni, karamo nesinamoni, pamwe nemiti yose yorusenzi, mura negavakava, pamwe nezvinonhuhwira zvose zvakanakisisa. a a v14 Karamo itsanga inonhuhwirira inoshandiswa sechinonhuhwira. 15Uri chitubu chebindu, tsime remvura mhenyu, uye hova dzinoyerera dzichibva kuRebhanoni. 16Muka, iwe mhepo yokuchamhembe, uye uya, iwe mhepo yezasi! Fembera mubindu rangu, kuti zvinonhuhwira zvaro zviyerere. Mudiwa wangu ngaapinde mubindu rake adye michero yaro yakaisvonaka.