Awan ti Pagkuranganmo

Ipadayaw ti lalaki ti babai iti tunggal paset ti bagina, awaganna a nobiana ken kabsatna, ket kunana nga awan ti biddutna. Isu ket nakandado a minuyongan, nasellaan nga ubbog, kukuana laeng. Iti ngudo, sungbatanna, awaganna ti angin ket isu mismo ti mangluklukat iti dayta a minuyongan.

Kapitulo 4.

Anian a kinapintasmo, ay-ayatek, anian a kinapintasmo! Kalapati dagiti matam iti likudan ti belomo. Kas iti arban dagiti kalding ti buokmo a bumaba kadagiti turod ti Galaad. Dagiti ngipenmo ket kas iti arban dagiti karnero a babai a kaputputed ti dutdotda a rumuar manipud iti pagdigusan, tunggal maysa ket mangiyanak iti kambal, ket awan uray maysa kadakuada a napukawan iti anakna. Kas iti nalabaga a sinulid dagiti bibigmo, ket naganas ti ngiwatmo. Kas iti kapat ti granada dagiti pingpingmo iti likudan ti belomo. Kas iti torre ni David ti tengngedmo, a naipatakder iti nagsasaruno a bato; naibitinen ditoy ti 1,000 a kalasag, tunggal maysa ket kalasag ti maysa a mannakigubat. Kas iti dua nga urbon a lugan dagiti dua a sususom, kambal nga urbon ti gasela, nga agkakanen kadagiti lirio. Agingga nga agang-angin ti aldaw ken tumalaw dagiti anniniwan, mapanakto iti bantay ti mirra ken iti turod ti insienso. Nagpintaska unay, ay-ayatek; awan ti pagkuranganmo.

Umayka kaduak manipud Libano, nobiak; umayka kaduak manipud Libano. Kumitaka manipud iti tuktok ti Amana, manipud iti tuktok ti Senir ken Hermon, manipud kadagiti rukib dagiti leon, manipud kadagiti pagnaedan dagiti leopardo kadagiti bantay. Inagawmo ti pusok, kabsatko, nobiak; inagawmo ti pusok iti maysa laeng a kitkita dagiti matam, iti maysa laeng nga alahas ti kuwintasmo. Anian a pintas ti ayatmo, kabsatko, nobiak! Anian a nasaysayaat ti ayatmo ngem ti arak, ken ti ayamuom dagiti lanaam ngem iti aniaman a rekado! Agtedtedted ti nektar dagiti bibigmo, nobiak; adda diro ken gatas iti sirok ti dilam, ken ti ayamuom dagiti badom ket kas iti ayamuom ti Libano.

Nakakandado a minuyongan ti kabsatko, nobiak, nakakandado nga ubbog, naselyuan a gubuayan. Dagiti sangam ket minuyongan dagiti granada nga addaan kadagiti kasayaatan a bunga, henna a kadua ti nardo, nardo ken safron, kalamo ken kanela, agraman tunggal kayo ti insienso, mirra ken aloe, agraman amin a kasayaatan a rekado. ^a Sika ti gubuayan iti minuyongan, bubon ti sibibiag a danum, ken dagiti waig a agay-ayus manipud Libano. Agriingka, angin ti amianan, ket umayka, angin ti abagatan! Puyotam ti minuyongak, tapno agay-ayus dagiti rekadona. Umay koma ti ay-ayatek iti minuyongana ket kanenna dagiti kasayaatan a bungana.