ପରମ ଗୀତ 4 FHB Father's Heart Bible™

4 ¹ହେ ମୋହର ପ୍ରିୟେ, ତୁମ୍ଭେ କିପରି ସୁନ୍ଦରୀ, ତୁମ୍ଭେ କିପରି ସୁନ୍ଦରୀ! ତୁମ୍ଭ ଓଢ଼଼ଣୀ ତଳେ ତୁମ୍ଭ ଚକ୍ଷୁ କପୋତ ତୁଲ୍ୟ। ତୁମ୍ଭ କେଶ ଗିଲୀୟଦ ପର୍ବତର ଢ଼ାଲୁ ବହି ଆସୁଥିବା ଛାଗପଲ ପରି। ²ତୁମ୍ଭ ଦନ୍ତ ନୂତନ କର୍ତ୍ତିତ ଲୋମ ବିଶିଷ୍ଟ ମେଷୀପଲ ତୁଲ୍ୟ, ଯେଉଁମାନେ ପ୍ରକ୍ଷାଳନ ସ୍ଥାନରୁ ଉଠି ଆସନ୍ତି, ପ୍ରତ୍ୟେକ ଯାଆଁଳା ଜନ୍ମ କରନ୍ତି, ଆଉ ସେମାନଙ୍କ ମଧ୍ୟରେ କେହି ବନ୍ଧ୍ୟା ନାହିଁ। ³ତୁମ୍ଭ ଓଷ୍ଠ ସିନ୍ଦୂରବର୍ଣ୍ଣ ସୂତା ପରି, ଆଉ ତୁମ୍ଭ ମୁଖ ମନୋହର। ତୁମ୍ଭ ଓଢ଼ଣୀ ତଳେ ତୁମ୍ଭ କପୋଳ ଦୁଇ ଖଣ୍ଡ ଡାଳିମ୍ବ ପରି। ⁴ତୁମ୍ଭ ଗ୍ରୀବା ଦାଉଦଙ୍କ ଦୁର୍ଗ ତୁଲ୍ୟ, ଯାହା ପ୍ରସ୍ତରର ଧାଡ଼ିରେ ନିର୍ମିତ; ତହିଁ ଉପରେ ଏକ ହଜାର ଢାଲ ଝୁଲୁଅଛି, ପ୍ରତ୍ୟେକ ଯୋଦ୍ଧାର ଢାଲ। ⁵ତୁମ୍ଭ ସ୍ତନଦ୍ଵୟ ହରିଣର ଯାଆଁଳା, କଇଁଫୁଲ ମଧ୍ୟରେ ଚରୁଥିବା ଦୁଇ ହରିଣଶାବକ ତୁଲ୍ୟ। ⁶ଯେପର୍ଯ୍ୟନ୍ତ ଦିବସ ନିଃଶ୍ଵାସ ଛାଡ଼ି ଛାୟା ପଳାଇ ନ ଯାଏ, ସେପର୍ଯ୍ୟନ୍ତ ମୁଁ ଗନ୍ଧରସର ପର୍ବତକୁ ଓ କୁନ୍ଦୁରୁର ଉପପର୍ବତକୁ ଯିବି। ⁷ହେ ମୋହର ପ୍ରିୟେ, ତୁମ୍ଭେ ସର୍ବାଙ୍ଗ ସୁନ୍ଦରୀ; ତୁମ୍ଭଠାରେ କୌଣସି ଖୁଣ ନାହିଁ।

⁸ହେ ମୋହର କନ୍ୟେ, ମୋʼ ସଙ୍ଗରେ ଲିବାନୋନରୁ ଆସ; ମୋʼ ସଙ୍ଗରେ ଲିବାନୋନରୁ ଆସ। ଅମାନା ଶୃଙ୍ଗରୁ, ସନୀର ଓ ହର୍ମୋନ ଶୃଙ୍ଗରୁ, ସିଂହର ଗୁହାରୁ, ଚିତାବାଘର ପର୍ବତସ୍ଥ ବାସସ୍ଥାନରୁ ତଳକୁ ଚାହିଁ ଦେଖ। ⁹ହେ ମୋହର ଭଗିନୀ, ମୋହର କନ୍ୟେ, ତୁମ୍ଭେ ମୋହର ହୃଦୟ ହରଣ କରିଅଛ; ତୁମ୍ଭ ଚକ୍ଷୁର ଏକ ଦୃଷ୍ଟିପାତ ଦ୍ଵାରା, ତୁମ୍ଭ ହାରର ଏକ ମଣି ଦ୍ଵାରା ତୁମ୍ଭେ ମୋହର ହୃଦୟ ହରଣ କରିଅଛ। ¹⁰ହେ ମୋହର ଭଗିନୀ, ମୋହର କନ୍ୟେ, ତୁମ୍ଭର ପ୍ରେମ କିପରି ସୁନ୍ଦର! ତୁମ୍ଭର ପ୍ରେମ ଦ୍ରାକ୍ଷାରସଠାରୁ ଓ ତୁମ୍ଭ ତୈଳର ସୁବାସ ସମସ୍ତ ସୁଗନ୍ଧି ଦ୍ରବ୍ୟଠାରୁ କେତେ ଉତ୍ତମ! ¹¹ହେ ମୋହର କନ୍ୟେ, ତୁମ୍ଭ ଓଷ୍ଠ ମଧୁ କ୍ଷରଣ କରେ; ତୁମ୍ଭ ଜିହ୍ଵା ତଳେ ମଧୁ ଓ ଦୁଗ୍ଧ ଅଛି, ଆଉ ତୁମ୍ଭ ବସ୍ତ୍ରର ସୁବାସ ଲିବାନୋନର ସୁବାସ ତୁଲ୍ୟ।

¹²ମୋହର ଭଗିନୀ, ମୋହର କନ୍ୟା ରୁଦ୍ଧ ଉଦ୍ୟାନ ତୁଲ୍ୟ, ରୁଦ୍ଧ ନିର୍ଝର, ମୁଦ୍ରାଙ୍କିତ ଜଳାଶୟ। ¹³ତୁମ୍ଭ ଶାଖାସବୁ ଉତ୍କୃଷ୍ଟ ଫଳ ବିଶିଷ୍ଟ ଡାଳିମ୍ବର ଉଦ୍ୟାନ, ମେହେନ୍ଦି ଓ ଜଟାମାଂସୀ, ¹⁴ଜଟାମାଂସୀ ଓ କୁଙ୍କୁମ, ବଚ ଓ ଦାରୁଚିନି, ସମସ୍ତ କୁନ୍ଦୁରୁ ବୃକ୍ଷ, ଗନ୍ଧରସ ଓ ଅଗୁରୁ ସହିତ, ସମସ୍ତ ଉତ୍କୃଷ୍ଟ ସୁଗନ୍ଧି ଦ୍ରବ୍ୟ ସହିତ। ^a a v14 ବଚ ଏକ ସୁଗନ୍ଧଯୁକ୍ତ ନଳ, ଯାହା ସୁଗନ୍ଧି ଦ୍ରବ୍ୟ ରୂପେ ବ୍ୟବହୃତ ହୁଏ। ¹⁵ତୁମ୍ଭେ ଉଦ୍ୟାନର ନିର୍ଝର, ଅମୃତ ଜଳର କୂପ, ଆଉ ଲିବାନୋନରୁ ବହି ଆସୁଥିବା ସ୍ରୋତ। ¹⁶ହେ ଉତ୍ତରୀୟ ବାୟୁ, ଜାଗ୍ରତ ହୁଅ, ଆଉ ହେ ଦକ୍ଷିଣୀୟ ବାୟୁ, ଆସ! ମୋହର ଉଦ୍ୟାନ ଉପରେ ବହ, ଯେପରି ତହିଁର ସୁଗନ୍ଧି ଦ୍ରବ୍ୟ କ୍ଷରିତ ହୁଏ। ମୋହର ପ୍ରିୟତମ ଆପଣା ଉଦ୍ୟାନକୁ ଆସନ୍ତୁ ଓ ତହିଁର ଉତ୍କୃଷ୍ଟ ଫଳ ଭୋଜନ କରନ୍ତୁ।