Ọ Dịghị Ntụpọ Dị Na Gị

Nwoke ahụ na-eto nwaanyị ahụ akụkụ n'akụkụ, na-akpọ ya nwunye ọhụrụ ya na nwanne ya nwaanyị, na-asị na ntụpọ ọ bụla adịghị n'ahụ ya. Ọ bụ ubi a kpọchiri akpọchi, isi iyi e kara akara, nke ya naanị. N'ikpeazụ ọ zaghachiri, na-akpọ ifufe ma meghee ubi ahụ n'onwe ya.

Isi 4.

Lee ka ị si maa mma, onye m hụrụ nʼanya, lee ka ị si maa mma! Anya gị bụ nduru nọ nʼazụ akwa mkpuchi ihu gị. Ntutu gị dị ka igwe ewu nke na-agbadata nʼelu ugwu Gilead. Eze gị dị ka igwe atụrụ a kpachapụrụ ajị ọhụrụ, ndị na-arịgopụta site nʼebe a na-asa ahụ, nke ọ bụla na-amụ ejima, ọ dịghịkwa otu nʼime ha na-enweghị nwa. Egbugbere ọnụ gị dị ka eriri uhie uhie, ọnụ gị makwara mma. Agba gị dị ka ọkara mkpụrụ pomegranet nʼazụ akwa mkpuchi ihu gị. Olu gị dị ka ụlọ elu Devid, nke e wuru nʼusoro nkume; otu puku ọta ka a kwụbara nʼelu ya, nke ọ bụla bụ ọta dike nʼagha. Ara gị abụọ dị ka ụmụ mgbada abụọ, ejima ele, ndị na-ata nri nʼetiti okoko lili. Ruo mgbe ụbọchị ga-eku ume, onyinyo niile agbalaga, aga m aga nʼugwu máá na nʼugwu nta frankinsens. Ị maa mma nʼụzọ niile, onye m hụrụ nʼanya; ọ dịghị ntụpọ dị na gị.

Soro m si na Lebanọn bịa, nwunye m; soro m si na Lebanọn bịa. Site nʼelu ugwu Amana ledata anya, site nʼelu ugwu Senir na Hermọn, site nʼọgba ụmụ ọdụm, site nʼebe agụ owuru na-ebi nʼugwu. Ị napụla m obi m, nwanne m nwanyị, nwunye m; i were otu ntule anya gị napụ m obi m, were otu mkpụrụ ihe ịchọ mma nke olu gị. Lee ka ịhụnanya gị si maa mma, nwanne m nwanyị, nwunye m! Lee ka ịhụnanya gị si karịa mmanya mma, isi ụtọ nke mmanụ gị niile karịakwa ụda ọ bụla! Egbugbere ọnụ gị na-atụda mmanụ aṅụ, nwunye m; mmanụ aṅụ na mmiri ara dị nʼokpuru ire gị, isi ụtọ nke uwe gị dịkwa ka isi ụtọ Lebanọn.

Ubi a kpọchiri akpọchi ka nwanne m nwanyị bụ, nwunye m, isi iyi a kpọchiri akpọchi, isi mmiri e mechiri emechi. Alaka gị bụ ubi pomegranet nke jupụtara na mkpụrụ osisi kacha mma, hena na nadị, nadị na safrọn, kalamọs na sinamọn, na osisi niile nke frankinsens, máá na aloos, na ụda niile kacha mma. ^a Ị bụ isi mmiri nke ubi, olulu mmiri nke mmiri dị ndụ, na iyi nke na-asọdata site na Lebanọn. Teta, ikuku ugwu, bịakwa, ikuku ndịda! Kuo ume nʼelu ubi m, ka ụda ya niile wee na-asọpụta. Ka onye m hụrụ nʼanya bata nʼubi ya rie mkpụrụ ya kacha mma.